அத² அநந்தரம் அதி⁴தை³வதம் தே³வதாவிஷயம் த³ர்ஶநமுச்யதே । கஸ்ய தே³வதாவிஶேஷஸ்ய வ்ரததா⁴ரணம் ஶ்ரேய இதி மீமாம்ஸ்யதே । அத்⁴யாத்மவத்ஸர்வம் । ஜ்வலிஷ்யாம்யேவாஹமித்யக்³நிர்த³த்⁴ரே ; தப்ஸ்யாம்யஹமித்யாதி³த்ய: ; பா⁴ஸ்யாம்யஹமிதி சந்த்³ரமா: ; ஏவமந்யா தே³வதா யதா²தை³வதம் । ஸ: அத்⁴யாத்மம் வாகா³தீ³நாமேஷாம் ப்ராணாநாம் மத்⁴யே மத்⁴யம: ப்ராணோ ம்ருத்யுநா அநாப்த: ஸ்வகர்மணோ ந ப்ரச்யாவித: ஸ்வேந ப்ராணவ்ரதேநாப⁴க்³நவ்ரதோ யதா², ஏவம் ஏதாஸாமக்³ந்யாதீ³நாம் தே³வதாநாம் வாயுரபி । ம்லோசந்தி அஸ்தம் யந்தி ஸ்வகர்மப்⁴ய உபரமந்தே — யதா² அத்⁴யாத்மம் வாகா³த³யோ(அ)ந்யா தே³வதா அக்³ந்யாத்³யா: ; ந வாயுரஸ்தம் யாதி — யதா² மத்⁴யம: ப்ராண: ; அத: ஸைஷா அநஸ்தமிதா தே³வதா யத்³வாயு: யோ(அ)யம் வாயு: । ஏவமத்⁴யாத்மமதி⁴தை³வம் ச மீமாம்ஸித்வா நிர்தா⁴ரிதம் — ப்ராணவாய்வாத்மநோர்வ்ரதமப⁴க்³நமிதி ॥