ಪ್ರಪಂಚಿತಸ್ಯಾವಿದ್ಯಾಕಾರ್ಯಸ್ಯ ಸಂಕ್ಷೇಪೇಣೋಪಸಂಹಾರಾರ್ಥಂ ಬ್ರಾಹ್ಮಣಾಂತರಮವತಾರಯತಿ —
ತದೇತದಿತಿ ।
ಫಲಮಪಿ ಜ್ಞಾನಕರ್ಮಣೋರುಕ್ತವಿಶೇಷಣವದ್ಯದೇತತ್ಪ್ರಸ್ತುತಮಿತಿ ಸಂಬಂಧಃ ।
ಅವ್ಯಾಕೃತಪ್ರಕ್ರಿಯಾಯಾಮುಕ್ತಂ ಸ್ಮಾರಯತಿ —
ಯಾ ಚೇತಿ ।
ವ್ಯಾಕೃತಾವ್ಯಾಕೃತಸ್ಯ ಜಗತಃ ಸಂಗೃಹೀತಂ ರೂಪಮಾಹ —
ಸರ್ವಮಿತಿ ।
ವಾಙ್ಮನಃಪ್ರಾಣಾಖ್ಯಂ ತ್ರಯಮಿತಿ ಶಂಕಾಂ ಪ್ರತ್ಯಾಹ —
ಕಿಂ ತದಿತ್ಯಾದಿನಾ ।
ಕಿಮರ್ಥಃ ಪುನರಯಮುಪಸಂಹಾರ ಇತ್ಯಾಶಂಕ್ಯಾಽಽಹ —
ಅನಾತ್ಮೈವೇತಿ ।
ಆತ್ಮಶಬ್ದಾರ್ಥಮಾಹ —
ಯತ್ಸಾಕ್ಷಾದಿತಿ ।
ಅನಾತ್ಮತ್ವೇನ ಜಗತೋ ಹೇಯತ್ವಂ ತಚ್ಛಬ್ದೇನ ಪರಾಮೃಶ್ಯತೇ ।
ವೈರಾಗ್ಯಮಪಿ ಕಿಮರ್ಥಮಿತ್ಯಾಶಂಕ್ಯಾಽಽಹ —
ನ ಹೀತಿ ।
ಅವಿರಕ್ತೋಽಪಿ ಕುತೂಹಲಿತಯಾ ತತ್ರಾಧಿಕಾರೀ ಸ್ಯಾದಿತ್ಯಾಶಂಕ್ಯಾಽಽಹ —
ಬಾಹ್ಯೇತಿ ।
ಅನಾತ್ಮಪ್ರವಣಮಪ್ಯಾತ್ಮಾನಂ ಪ್ರತ್ಯಾಯಯಿಷ್ಯತ್ಯಾತ್ಮನಃ ಸರ್ವಾತ್ಮತ್ವಾತ್ಕುತೋ ವಿರೋಧ ಇತ್ಯಾಶಂಕ್ಯಾಹ —
ತಥೇತಿ ।
ಕಥಂ ತರ್ಹಿ ಪ್ರತ್ಯಗಾತ್ಮಧೀಸ್ತತ್ರಾಽಽಹ —
ಕಶ್ಚಿದಿತಿ ।