ப்³ருஹதா³ரண்யகோபநிஷத்³பா⁴ஷ்யம்
ப்ரத²மோ(அ)த்⁴யாய:ஷஷ்ட²ம் ப்³ராஹ்மணம்
பூர்வப்ருஷ்ட²ம்      உத்தரப்ருஷ்ட²ம்
ஆநந்த³கி³ரிடீகா (ப்³ருஹதா³ரண்யக)
 
த்ரயம் வா இத³ம் நாம ரூபம் கர்ம தேஷாம் நாம்நாம் வாகி³த்யேததே³ஷாமுக்த²மதோ ஹி ஸர்வாணி நாமாந்யுத்திஷ்ட²ந்தி । ஏததே³ஷாம் ஸாமைதத்³தி⁴ ஸர்வைர்நாமபி⁴: ஸமமேததே³ஷாம் ப்³ரஹ்மைதத்³தி⁴ ஸர்வாணி நாமாநி பி³ப⁴ர்தி ॥ 1 ॥
யதே³தத³வித்³யாவிஷயத்வேந ப்ரஸ்துதம் ஸாத்⁴யஸாத⁴நலக்ஷணம் வ்யாக்ருதம் ஜக³த் ப்ராணாத்மப்ராப்த்யந்தோத்கர்ஷவத³பி ப²லம் , யா சைதஸ்ய வ்யாகரணாத்ப்ராக³வஸ்தா² அவ்யாக்ருதஶப்³த³வாச்யா — வ்ருக்ஷபீ³ஜவத் ஸர்வமேதத் த்ரயம் ; கிம் தத்த்ரயமித்யுச்யதே — நாம ரூபம் கர்ம சேதி அநாத்மைவ — ந ஆத்மா யத்ஸாக்ஷாத³பரோக்ஷாத்³ப்³ரஹ்ம ; தஸ்மாத³ஸ்மாத்³விரஜ்யேதேத்யேவமர்த²: த்ரயம் வா இத்யாத்³யாரம்ப⁴: । ந ஹ்யஸ்மாத் அநாத்மந: அவ்யாவ்ருத்தசித்தஸ்ய ஆத்மாநமேவ லோகம் அஹம் ப்³ரஹ்மாஸ்மீத்யுபாஸிதும் பு³த்³தி⁴: ப்ரவர்ததே, பா³ஹ்யப்ரத்யகா³த்மப்ரவ்ருத்த்யோர்விரோதா⁴த் । ததா² ச காட²கே — ‘பராஞ்சி கா²நி வ்யத்ருணத்ஸ்வயம்பூ⁴ஸ்தஸ்மாத்பராங்பஶ்யதி நாந்தராத்மந் । கஶ்சித்³தீ⁴ர: ப்ரத்யகா³த்மாநமைக்ஷதா³வ்ருத்தசக்ஷுரம்ருதத்வமிச்ச²ந்’ (க . 2 । 1 । 1) இத்யாதி³ ॥

ப்ரபஞ்சிதஸ்யாவித்³யாகார்யஸ்ய ஸம்க்ஷேபேணோபஸம்ஹாரார்த²ம் ப்³ராஹ்மணாந்தரமவதாரயதி —

ததே³ததி³தி ।

ப²லமபி ஜ்ஞாநகர்மணோருக்தவிஶேஷணவத்³யதே³தத்ப்ரஸ்துதமிதி ஸம்ப³ந்த⁴: ।

அவ்யாக்ருதப்ரக்ரியாயாமுக்தம் ஸ்மாரயதி —

யா சேதி ।

வ்யாக்ருதாவ்யாக்ருதஸ்ய ஜக³த: ஸம்க்³ருஹீதம் ரூபமாஹ —

ஸர்வமிதி ।

வாங்மந:ப்ராணாக்²யம் த்ரயமிதி ஶங்காம் ப்ரத்யாஹ —

கிம் ததி³த்யாதி³நா ।

கிமர்த²: புநரயமுபஸம்ஹார இத்யாஶங்க்யா(அ)(அ)ஹ —

அநாத்மைவேதி ।

ஆத்மஶப்³தா³ர்த²மாஹ —

யத்ஸாக்ஷாதி³தி ।

அநாத்மத்வேந ஜக³தோ ஹேயத்வம் தச்ச²ப்³தே³ந பராம்ருஶ்யதே ।

வைராக்³யமபி கிமர்த²மித்யாஶங்க்யா(அ)(அ)ஹ —

ந ஹீதி ।

அவிரக்தோ(அ)பி குதூஹலிதயா தத்ராதி⁴காரீ ஸ்யாதி³த்யாஶங்க்யா(அ)(அ)ஹ —

பா³ஹ்யேதி ।

அநாத்மப்ரவணமப்யாத்மாநம் ப்ரத்யாயயிஷ்யத்யாத்மந: ஸர்வாத்மத்வாத்குதோ விரோத⁴ இத்யாஶங்க்யாஹ —

ததே²தி ।

கத²ம் தர்ஹி ப்ரத்யகா³த்மதீ⁴ஸ்தத்ரா(அ)(அ)ஹ —

கஶ்சிதி³தி ।