ತತ್ರ ಪೂರ್ವಪಕ್ಷವಾದೀ ಅವಿದ್ಯಾವಿಷಯಬ್ರಹ್ಮವಿತ್ ದೃಪ್ತಬಾಲಾಕಿಃ - ದೃಪ್ತಃ ಗರ್ವಿತಃ ಅಸಮ್ಯಗ್ಬ್ರಹ್ಮವಿತ್ತ್ವಾದೇವ — ಬಲಾಕಾಯಾ ಅಪತ್ಯಂ ಬಾಲಾಕಿಃ, ದೃಪ್ತಶ್ಚಾಸೌ ಬಾಲಾಕಿಶ್ಚೇತಿ ದೃಪ್ತಬಾಲಾಕಿಃ, ಹ - ಶಬ್ದ ಐತಿಹ್ಯಾರ್ಥ ಆಖ್ಯಾಯಿಕಾಯಾಮ್ , ಅನೂಚಾನಃ ಅನುವಚನಸಮರ್ಥಃ ವಕ್ತಾ ವಾಗ್ಮೀ, ಗಾರ್ಗ್ಯೋ ಗೋತ್ರತಃ, ಆಸ ಬಭೂವ ಕ್ವಚಿತ್ಕಾಲವಿಶೇಷೇ । ಸ ಹೋವಾಚ ಅಜಾತಶತ್ರುಮ್ ಅಜಾತಶತ್ರುನಾಮಾನಮ್ ಕಾಶ್ಯಂ ಕಾಶಿರಾಜಮ್ ಅಭಿಗಮ್ಯ — ಬ್ರಹ್ಮ ತೇ ಬ್ರವಾಣೀತಿ ಬ್ರಹ್ಮ ತೇ ತುಭ್ಯಂ ಬ್ರವಾಣಿ ಕಥಯಾನಿ । ಸ ಏವಮುಕ್ತೋಽಜಾತಶತ್ರುರುವಾಚ — ಸಹಸ್ರಂ ಗವಾಂ ದದ್ಮಃ ಏತಸ್ಯಾಂ ವಾಚಿ — ಯಾಂ ಮಾಂ ಪ್ರತ್ಯವೋಚಃ ಬ್ರಹ್ಮ ತೇ ಬ್ರವಾಣೀತಿ, ತಾವನ್ಮಾತ್ರಮೇವ ಗೋಸಹಸ್ರಪ್ರದಾನೇ ನಿಮಿತ್ತಮಿತ್ಯಭಿಪ್ರಾಯಃ । ಸಾಕ್ಷಾದ್ಬ್ರಹ್ಮಕಥನಮೇವ ನಿಮಿತ್ತಂ ಕಸ್ಮಾನ್ನಾಪೇಕ್ಷ್ಯತೇ ಸಹಸ್ರದಾನೇ, ಬ್ರಹ್ಮ ತೇ ಬ್ರವಾಣೀತಿ ಇಯಮೇವ ತು ವಾಕ್ ನಿಮಿತ್ತಮಪೇಕ್ಷ್ಯತ ಇತ್ಯುಚ್ಯತೇ — ಯತಃ ಶ್ರುತಿರೇವ ರಾಜ್ಞೋಽಭಿಪ್ರಾಯಮಾಹ — ಜನಕೋ ದಾತಾ ಜನಕಃ ಶ್ರೋತೇತಿ ಚ ಏತಸ್ಮಿನ್ವಾಕ್ಯದ್ವಯೇ ಏತದ್ವಯಮಭ್ಯಸ್ಯತೇ ಜನಕೋ ಜನಕ ಇತಿ ; ವೈ - ಶಬ್ದಃ ಪ್ರಸಿದ್ಧಾವದ್ಯೋತನಾರ್ಥಃ ; ಜನಕೋ ದಿತ್ಸುರ್ಜನಕಃ ಶುಶ್ರೂಷುರಿತಿ ಬ್ರಹ್ಮ ಶುಶ್ರೂಷವೋ ವಿವಕ್ಷವಃ ಪ್ರತಿಜಿಘೃಕ್ಷವಶ್ಚ ಜನಾಃ ಧಾವಂತಿ ಅಭಿಗಚ್ಛಂತಿ ; ತಸ್ಮಾತ್ ತತ್ಸರ್ವಂ ಮಯ್ಯಪಿ ಸಂಭಾವಿತವಾನಸೀತಿ ॥