ನನು ದರ್ಶನಲಕ್ಷಣಾಯಾಂ ಸ್ವಪ್ನಾವಸ್ಥಾಯಾಂ ಕಾರ್ಯಕರಣವಿಯೋಗೇಽಪಿ ಸಂಸಾರಧರ್ಮಿತ್ವಮಸ್ಯ ದೃಶ್ಯತೇ — ಯಥಾ ಚ ಜಾಗರಿತೇ ಸುಖೀ ದುಃಖೀ ಬಂಧುವಿಯುಕ್ತಃ ಶೋಚತಿ ಮುಹ್ಯತೇ ಚ ; ತಸ್ಮಾತ್ ಶೋಕಮೋಹಧರ್ಮವಾನೇವಾಯಮ್ ; ನಾಸ್ಯ ಶೋಕಮೋಹಾದಯಃ ಸುಖದುಃಖಾದಯಶ್ಚ ಕಾರ್ಯಕರಣಸಂಯೋಗಜನಿತಭ್ರಾಂತ್ಯಾ ಅಧ್ಯಾರೋಪಿತಾ ಇತಿ । ನ, ಮೃಷಾತ್ವಾತ್ — ಸಃ ಪ್ರಕೃತ ಆತ್ಮಾ ಯತ್ರ ಯಸ್ಮಿನ್ಕಾಲೇ ದರ್ಶನಲಕ್ಷಣಯಾ ಸ್ವಪ್ನ್ಯಯಾ ಸ್ವಪ್ನವೃತ್ತ್ಯಾ ಚರತಿ ವರ್ತತೇ, ತದಾ ತೇ ಹ ಅಸ್ಯ ಲೋಕಾಃ ಕರ್ಮಫಲಾನಿ — ಕೇ ತೇ ? ತತ್ ತತ್ರ ಉತ ಅಪಿ ಮಹಾರಾಜ ಇವ ಭವತಿ ; ಸೋಽಯಂ ಮಹಾರಾಜತ್ವಮಿವ ಅಸ್ಯ ಲೋಕಃ, ನ ಮಹಾರಾಜತ್ವಮೇವ ಜಾಗರಿತ ಇವ ; ತಥಾ ಮಹಾಬ್ರಾಹ್ಮಣ ಇವ, ಉತ ಅಪಿ, ಉಚ್ಚಾವಚಮ್ — ಉಚ್ಚಂ ಚ ದೇವತ್ವಾದಿ, ಅವಚಂ ಚ ತಿರ್ಯಕ್ತ್ವಾದಿ, ಉಚ್ಚಮಿವ ಅವಚಮಿವ ಚ — ನಿಗಚ್ಛತಿ ಮೃಷೈವ ಮಹಾರಾಜತ್ವಾದಯೋಽಸ್ಯ ಲೋಕಾಃ, ಇವ - ಶಬ್ದಪ್ರಯೋಗಾತ್ , ವ್ಯಭಿಚಾರದರ್ಶನಾಚ್ಚ ; ತಸ್ಮಾತ್ ನ ಬಂಧುವಿಯೋಗಾದಿಜನಿತಶೋಕಮೋಹಾದಿಭಿಃ ಸ್ವಪ್ನೇ ಸಂಬಧ್ಯತ ಏವ ॥