నను దర్శనలక్షణాయాం స్వప్నావస్థాయాం కార్యకరణవియోగేఽపి సంసారధర్మిత్వమస్య దృశ్యతే — యథా చ జాగరితే సుఖీ దుఃఖీ బన్ధువియుక్తః శోచతి ముహ్యతే చ ; తస్మాత్ శోకమోహధర్మవానేవాయమ్ ; నాస్య శోకమోహాదయః సుఖదుఃఖాదయశ్చ కార్యకరణసంయోగజనితభ్రాన్త్యా అధ్యారోపితా ఇతి । న, మృషాత్వాత్ — సః ప్రకృత ఆత్మా యత్ర యస్మిన్కాలే దర్శనలక్షణయా స్వప్న్యయా స్వప్నవృత్త్యా చరతి వర్తతే, తదా తే హ అస్య లోకాః కర్మఫలాని — కే తే ? తత్ తత్ర ఉత అపి మహారాజ ఇవ భవతి ; సోఽయం మహారాజత్వమివ అస్య లోకః, న మహారాజత్వమేవ జాగరిత ఇవ ; తథా మహాబ్రాహ్మణ ఇవ, ఉత అపి, ఉచ్చావచమ్ — ఉచ్చం చ దేవత్వాది, అవచం చ తిర్యక్త్వాది, ఉచ్చమివ అవచమివ చ — నిగచ్ఛతి మృషైవ మహారాజత్వాదయోఽస్య లోకాః, ఇవ - శబ్దప్రయోగాత్ , వ్యభిచారదర్శనాచ్చ ; తస్మాత్ న బన్ధువియోగాదిజనితశోకమోహాదిభిః స్వప్నే సమ్బధ్యత ఎవ ॥