ಉಕ್ತಮಂಗೀಕೃತ್ಯ ವಿಶೇಷದೃಷ್ಟ್ಯಾ ಸಂಶಯಾನೋ ವಿಚಾರಂ ಪ್ರಸ್ತೌತಿ —

ಭವತ್ವಿತಿ ।

ಸಂದಿಗ್ಧಂ ಸಪ್ರಯೋಜನಂ ಚ ವಿಚಾರ್ಯಮಿತಿ ನ್ಯಾಯೇನ ಸಂದೇಹಮುಕ್ತ್ವಾ ವಿಚಾರಪ್ರಯೋಜಕಂ ಪ್ರಯೋಜನಂ ಪೃಚ್ಛತಿ —

ಕಿಂಚಾತ ಇತಿ ।

ಕಸ್ಮಿನ್ಪಕ್ಷೇ ಕಿಂ ಫಲತೀತಿ ಪೃಷ್ಟೇ ಪ್ರಥಮಪಕ್ಷಮನೂದ್ಯ ತಸ್ಮಿನ್ಫಲಮಾಹ —

ಯದೀತಿ ।

ಯದ್ವಿಜ್ಞಾನಾನ್ಮುಕ್ತಿಸ್ತಸ್ಯೈವ ಜ್ಞೇಯತಾ ನ ಜೀವಸ್ಯೇತ್ಯಾಶಂಕ್ಯಾಽಽಹ —

ತದ್ವಿಜ್ಞಾನಾದಿತಿ ।

ಬ್ರಹ್ಮಜ್ಞಾನಾದೇವ ಸಾ ನ ಸಂಸಾರಿಜ್ಞಾನಾದಿತ್ಯಾಶಂಕ್ಯಾಽಽಹ —

ಸ ಏವೇತಿ ।

ತದ್ವಿದ್ಯಾ ಬ್ರಹ್ಮವಿದ್ಯಾ ತದೇವ ಬ್ರಹ್ಮ ನ ಸಂಸಾರೀತ್ಯಾಶಂಕ್ಯಾಽಽಹ —

ತದ್ವಿದ್ಯೈವೇತಿ ।

ಆದ್ಯಕಲ್ಪೀಯಫಲಸಮಾಪ್ತಾವಿತಿಶಬ್ದಃ ।

ಪಕ್ಷಾಂತರಮನೂದ್ಯ ತಸ್ಮಿನ್ಫಲಮಾಹ —

ಅಥೇತ್ಯಾದಿನಾ ।

ಕಿಮತ್ರ ನಿಯಾಮಕಮಿತ್ಯಾಶಂಕ್ಯ ಬ್ರಹ್ಮ ವಾ ಇದಮಿತ್ಯಾದಿ ಶಾಸ್ತ್ರಮಿತ್ಯಾಹ —

ಸರ್ವಮೇತದಿತಿ ।

ಬ್ರಹ್ಮೋಪನಿಷತ್ಪಕ್ಷೇ ಶಾಸ್ತ್ರಪ್ರಾಮಾಣ್ಯಾತ್ಸರ್ವಂ ಸಮಂಜಸಂ ಚೇತ್ತಥೈವಾಸ್ತು ಕಿಂ ವಿಚಾರೇಣೇತ್ಯಾಶಂಕ್ಯ ಜೀವಬ್ರಹ್ಮಣೋರ್ಭೇದೋಽಭೋದೋ ವೇತಿ ವಿಕಲ್ಪ್ಯಾಽಽದ್ಯೇ ದೋಷಮಾಹ —

ಕಿಂತ್ವಿತಿ ।

ಅಭೇದಪಕ್ಷಂ ದೂಷಯತಿ —

ಸಂಸಾರಿಣಶ್ಚೇತಿ ।

ಉಪೇದೇಶಾನರ್ಥಕ್ಯಾದಭೇದಪಕ್ಷಾನುಪಪತ್ತಿರಿತಿ ಶೇಷಃ ।

ವಿಶೇಷಾನುಪಲಂಭಸ್ಯ ಸಂಶಯಹೇತುತ್ವಮನುವದತಿ —

ಯತ ಇತಿ ।

ಪಕ್ಷದ್ವಯೇ ಫಲಪ್ರತೀತಿಂ ಪರಾಮೃಶತಿ —

ಏವಮಿತಿ ।

ಅನ್ವಯವ್ಯತಿರೇಕಕೌಶಲಂ ಪಾಂಡಿತ್ಯಮ್ । ಏತದಿತ್ಯೈಕಾತ್ಮ್ಯೋಕ್ತಿಃ । ಮಹತ್ತ್ವಂ ಮೋಹಸ್ಯ ವಿಚಾರೋತ್ಥನಿರ್ಣಯಂ ವಿನಾಽನುಚ್ಛಿನ್ನತ್ವಮ್ । ತಸ್ಯ ಸ್ಥಾನಮಾಲಂಬನಂ ಕೇನಾಪಿ ನೋಕ್ತಂ ಪ್ರತಿವಚನಂ ಯಸ್ಯ ಕಿಂ ತದೈಕಾತ್ಮ್ಯಮಿತಿ ಪ್ರಶ್ನಸ್ಯ ತಸ್ಯ ವಿಷಯಭೂತಮಿತಿ ಯಾವತ್ । ನ ಹಿ ಯೇನ ಕೇನಚಿದೈಕಾತ್ಮ್ಯಂ ಪ್ರಷ್ಟುಂ ಪ್ರತಿವಕ್ತುಂ ವಾ ಶಕ್ಯತೇ । ‘ಶ್ರವಣಾಯಾಪಿ ಬಹುಭಿರ್ಯೋ ನ ಲಭ್ಯಃ’(ಕ.ಉ. ೧-೨-೭) ಇತ್ಯಾದಿಶ್ರುತೇರಿತ್ಯರ್ಥಃ ।

ವಿಚಾರಪ್ರಯೋಜಕಮುಕ್ತ್ವಾ ತತ್ಕಾರ್ಯಂ ವಿಚಾರಮುಪಸಂಹರತಿ —

ಅತ ಇತಿ ।