ತತ್ ತತ್ರ ಏತಸ್ಮಿನ್ನರ್ಥೇ ಏಷ ಶ್ಲೋಕಃ ಮಂತ್ರೋ ಭವತಿ — ಅರ್ವಾಗ್ಬಿಲಶ್ಚಮಸ ಇತ್ಯಾದಿಃ । ತತ್ರ ಮಂತ್ರಾರ್ಥಮಾಚಷ್ಟೇ ಶ್ರುತಿಃ — ಅರ್ವಾಗ್ಬಿಲಶ್ಚಮಸ ಊರ್ಧ್ವಬುಧ್ನ ಇತಿ । ಕಃ ಪುನರಸಾವರ್ವಾಗ್ಬಿಲಶ್ಚಮಸ ಊರ್ಧ್ವಬುಧ್ನಃ ? ಇದಂ ತತ್ ; ಶಿರಃ ಚಮಸಾಕಾರಂ ಹಿ ತತ್ ; ಕಥಮ್ ? ಏಷ ಹಿ ಅರ್ವಾಗ್ಬಿಲಃ ಮುಖಸ್ಯ ಬಿಲರೂಪತ್ವಾತ್ , ಶಿರಸೋ ಬುಧ್ನಾಕಾರತ್ವಾತ್ ಊರ್ಧ್ವಬುಧ್ನಃ । ತಸ್ಮಿನ್ ಯಶೋ ನಿಹಿತಂ ವಿಶ್ವರೂಪಮಿತಿ — ಯಥಾ ಸೋಮಃ ಚಮಸೇ, ಏವಂ ತಸ್ಮಿನ್ ಶಿರಸಿ ವಿಶ್ವರೂಪಂ ನಾನಾರೂಪಂ ನಿಹಿತಂ ಸ್ಥಿತಂ ಭವತಿ । ಕಿಂ ಪುನಸ್ತತ್ ? ಯಶಃ — ಪ್ರಾಣಾ ವೈ ಯಶೋ ವಿಶ್ವರೂಪಮ್ — ಪ್ರಾಣಾಃ ಶ್ರೋತ್ರಾದಯಃ ವಾಯವಶ್ಚ ಮರುತಃ ಸಪ್ತಧಾ ತೇಷು ಪ್ರಸೃತಾಃ ಯಶಃ — ಇತ್ಯೇತದಾಹ ಮಂತ್ರಃ, ಶಬ್ದಾದಿಜ್ಞಾನಹೇತುತ್ವಾತ್ । ತಸ್ಯಾಸತ ಋಷಯಃ ಸಪ್ತ ತೀರ ಇತಿ — ಪ್ರಾಣಾಃ ಪರಿಸ್ಪಂದಾತ್ಮಕಾಃ, ತ ಏವ ಚ ಋಷಯಃ, ಪ್ರಾಣಾನೇತದಾಹ ಮಂತ್ರಃ । ವಾಗಷ್ಟಮೀ ಬ್ರಹ್ಮಣಾ ಸಂವಿದಾನೇತಿ — ಬ್ರಹ್ಮಣಾ ಸಂವಾದಂ ಕುರ್ವಂತೀ ಅಷ್ಟಮೀ ಭವತಿ ; ತದ್ಧೇತುಮಾಹ — ವಾಗ್ಘ್ಯಷ್ಟಮೀ ಬ್ರಹ್ಮಣಾ ಸಂವಿತ್ತ ಇತಿ ॥