ఆధిదైవికం మూర్తమభిధాయ తాదృగేవామూర్తం ప్రతీకోపాదానపూర్వకం స్ఫుటయతి —
అథేత్యాదినా ।
అమూర్తముభయత్ర హేతుత్వేన సంబధ్యతే । అపరిచ్ఛిన్నత్వమవిరోధే హేతుః ।
అమూర్తత్వాదీనాం మిథో విశేషణవిశేష్యభావో హేతుహేతుమద్భావశ్చ యథేష్టం ద్రష్టవ్య ఇత్యాఽఽహ —
పూర్వవదితి ।
పునరుక్తిరపి పూర్వవత్ । య ఎష ఇత్యాది ప్రతీకగ్రహణం తస్య వ్యాఖ్యానం కరణాత్మక ఇత్యాది ।
యథా భూతత్రయస్య మణ్డలం సారిష్ఠముక్తం తద్వదిత్యాహ —
పూర్వవదితి ।
సారిష్ఠత్వమనూద్య హేతుమాహ —
ఎతదితి ।
తాదర్థ్యాద్భూతద్వయస్య భూతత్రయోపసర్జనస్య స్వయమ్ప్రధానస్య హిరణ్యగర్భారమ్భార్థత్వాదితి యావత్ । భూతద్వయం భూతత్రయోపసర్జనమితి శేషః ।
హేతుమవతార్య వ్యాచష్టే —
త్యస్య హీతి ।
పురుషశబ్దాదుపరిష్టాత్సశబ్దో ద్రష్టవ్యః । అమూర్తత్వాదివిశేషణచతుష్టయవైశిష్ట్యం సాధర్మ్యమ్ ।
తత్ఫలమాహ —
తస్మాదితి ।