अद्वैतशारदा | दक्षिणाम्नाय श्रीशारदापीठम्, शृङ्गेरी

ತಸ್ಯ ಹೈತಸ್ಯ ಪುರುಷಸ್ಯ ರೂಪಮ್ । ಯಥಾ ಮಾಹಾರಜನಂ ವಾಸೋ ಯಥಾ ಪಾಂಡ್ವಾವಿಕಂ ಯಥೇಂದ್ರಗೋಪೋ ಯಥಾಗ್ನ್ಯರ್ಚಿರ್ಯಥಾ ಪುಂಡರೀಕಂ ಯಥಾ ಸಕೃದ್ವಿದ್ಯುತ್ತಂ ಸಕೃದ್ವಿದ್ಯುತ್ತೇವ ಹ ವಾ ಅಸ್ಯ ಶ್ರೀರ್ಭವತಿ ಯ ಏವಂ ವೇದಾಥಾತ ಆದೇಶೋ ನೇತಿ ನೇತಿ ನ ಹ್ಯೇತಸ್ಮಾದಿತಿ ನೇತ್ಯನ್ಯತ್ಪರಮಸ್ತ್ಯಥ ನಾಮಧೇಯಂ ಸತ್ಯಸ್ಯ ಸತ್ಯಮಿತಿ ಪ್ರಾಣಾ ವೈ ಸತ್ಯಂ ತೇಷಾಮೇಷ ಸತ್ಯಮ್ ॥ ೬ ॥

ಏವಂ ನಿರವಶೇಷಂ ಸತ್ಯಸ್ಯ ಸ್ವರೂಪಮಭಿಧಾಯ, ಯತ್ತತ್ಸತ್ಯಸ್ಯ ಸತ್ಯಮವೋಚಾಮ ತಸ್ಯೈವ ಸ್ವರೂಪಾವಧಾರಣಾರ್ಥಂ ಬ್ರಹ್ಮಣ ಇದಮಾರಭ್ಯತೇ — ಅಥ ಅನಂತರಂ ಸತ್ಯಸ್ವರೂಪನಿರ್ದೇಶಾನಂತರಮ್ , ಯತ್ಸತ್ಯಸ್ಯ ಸತ್ಯಂ ತದೇವಾವಶಿಷ್ಯತೇ ಯಸ್ಮಾತ್ — ಅತಃ ತಸ್ಮಾತ್ , ಸತ್ಯಸ್ಯ ಸತ್ಯಂ ಸ್ವರೂಪಂ ನಿರ್ದೇಕ್ಷ್ಯಾಮಃ ; ಆದೇಶಃ ನಿರ್ದೇಶಃ ಬ್ರಹ್ಮಣಃ ; ಕಃ ಪುನರಸೌ ನಿರ್ದೇಶ ಇತ್ಯುಚ್ಯತೇ — ನೇತಿ ನೇತೀತ್ಯೇವಂ ನಿರ್ದೇಶಃ ॥

ಏವಮಿತ್ಯಾದಿನಾ ; ಸತ್ಯಸ್ಯೇತಿ ;

ವೃತ್ತಮನೂದ್ಯಾನಂತರಗ್ರಂಥಮವತಾರಯತಿ —

ಏವಮಿತ್ಯಾದಿನಾ ।

ತಸ್ಯೈವ ಬ್ರಹ್ಮಣ ಇತಿ ಸಂಬಂಧಃ ।

ಕಸ್ಮಾದನಂತರಮಿತ್ಯುಕ್ತೇ ತದ್ದರ್ಶಯನ್ನಂತಃಶಬ್ದಂ ಚಾಪೇಕ್ಷಿತಂ ಪೂರಯನ್ವ್ಯಾಕರೋತಿ —

ಸತ್ಯಸ್ಯೇತಿ ।