ಮೈತ್ರೇಯೀತಿ ಹೋವಾಚ ಯಾಜ್ಞವಲ್ಕ್ಯಃ — ಮೈತ್ರೇಯೀಂ ಸ್ವಭಾರ್ಯಾಮಾಮಂತ್ರಿತವಾನ್ ಯಾಜ್ಞವಲ್ಕ್ಯೋ ನಾಮ ಋಷಿಃ ; ಉದ್ಯಾಸ್ಯನ್ ಊರ್ಧ್ವಂ ಯಾಸ್ಯನ್ ಪಾರಿವ್ರಾಜ್ಯಾಖ್ಯಮಾಶ್ರಮಾಂತರಮ್ ವೈ ; ‘ಅರೇ’ ಇತಿ ಸಂಬೋಧನಮ್ ; ಅಹಮ್ , ಅಸ್ಮಾತ್ ಗಾರ್ಹಸ್ಥ್ಯಾತ್ , ಸ್ಥಾನಾತ್ ಆಶ್ರಮಾತ್ , ಊರ್ಧ್ವಂ ಗಂತುಮಿಚ್ಛನ್ ಅಸ್ಮಿ ಭವಾಮಿ ; ಅತಃ ಹಂತ ಅನುಮತಿಂ ಪ್ರಾರ್ಥಯಾಮಿ ತೇ ತವ ; ಕಿಂಚಾನ್ಯತ್ — ತೇ ತವ ಅನಯಾ ದ್ವಿತೀಯಯಾ ಭಾರ್ಯಯಾ ಕಾತ್ಯಾಯನ್ಯಾ ಅಂತಂ ವಿಚ್ಛೇದಂ ಕರವಾಣಿ ; ಪತಿದ್ವಾರೇಣ ಯುವಯೋರ್ಮಯಾ ಸಂಬಧ್ಯಮಾನಯೋರ್ಯಃ ಸಂಬಂಧ ಆಸೀತ್ , ತಸ್ಯ ಸಂಬಂಧಸ್ಯ ವಿಚ್ಛೇದಂ ಕರವಾಣಿ ದ್ರವ್ಯವಿಭಾಗಂ ಕೃತ್ವಾ ; ವಿತ್ತೇನ ಸಂವಿಭಜ್ಯ ಯುವಾಂ ಗಮಿಷ್ಯಾಮಿ ॥