ಸ ಹೋವಾಚ ಯಾಜ್ಞವಲ್ಕ್ಯಃ । ಏವಂ ವಿತ್ತಸಾಧ್ಯೇಽಮೃತತ್ವಸಾಧನೇ ಪ್ರತ್ಯಾಖ್ಯಾತೇ, ಯಾಜ್ಞವಲ್ಕ್ಯಃ ಸ್ವಾಭಿಪ್ರಾಯಸಂಪತ್ತೌ ತುಷ್ಟ ಆಹ — ಸ ಹೋವಾಚ — ಪ್ರಿಯಾ ಇಷ್ಟಾ, ಬತೇತ್ಯನುಕಂಪ್ಯಾಹ, ಅರೇ ಮೈತ್ರೇಯಿ, ನ ಅಸ್ಮಾಕಂ ಪೂರ್ವಮಪಿ ಪ್ರಿಯಾ ಸತೀ ಭವಂತೀ ಇದಾನೀಂ ಪ್ರಿಯಮೇವ ಚಿತ್ತಾನುಕೂಲಂ ಭಾಷಸೇ । ಅತಃ ಏಹಿ ಆಸ್ಸ್ವ ಉಪವಿಶ ವ್ಯಾಖ್ಯಾಸ್ಯಾಮಿ — ಯತ್ ತೇ ತವ ಇಷ್ಟಮ್ ಅಮೃತತ್ವಸಾಧನಮಾತ್ಮಜ್ಞಾನಮ್ ಕಥಯಿಷ್ಯಾಮಿ । ವ್ಯಾಚಕ್ಷಾಣಸ್ಯ ತು ಮೇ ಮಮ ವ್ಯಾಖ್ಯಾನಂ ಕುರ್ವತಃ, ನಿದಿಧ್ಯಾಸಸ್ವ ವಾಕ್ಯಾನಿ ಅರ್ಥತೋ ನಿಶ್ಚಯೇನ ಧ್ಯಾತುಮಿಚ್ಛೇತಿ ॥