अद्वैतशारदा | दक्षिणाम्नाय श्रीशारदापीठम्, शृङ्गेरी

इदं सत्यं सर्वेषां भूतानां मध्वस्य सत्यस्य सर्वाणि भूतानि मधु यश्चायमस्मिन्सत्ये तेजोमयोऽमृतमयः पुरुषो यश्चायमध्यात्मं सात्यस्तेजोमयोऽमृतमयः पुरुषोऽयमेव स योऽयमात्मेदममृतमिदं ब्रह्मेदं सर्वम् ॥ १२ ॥

तथा दृष्टेनानुष्ठीयमानेन आचाररूपेण सत्याख्यो भवति, स एव धर्मः ; सोऽपि द्विप्रकार एव सामान्यविशेषात्मरूपेण — सामान्यरूपः पृथिव्यादिसमवेतः, विशेषरूपः कार्यकरणसङ्घातसमवेतः ; तत्र पृथिव्यादिसमवेते वर्तमानक्रियारूपे सत्ये, तथा अध्यात्मं कार्यकरणसङ्घातसमवेते सत्ये, भवः सात्यः — ‘सत्येन वायुरावाति’ (तै. ना. २ । १) इति श्रुत्यन्तरात् ॥

तथा दृष्टेनेति ; सामान्यरूप इति ; तत्रेति ; तथाऽध्यात्ममिति ; सत्येनेति ॥१२॥ ;

इदं सत्यमित्यस्मिन्पर्याये सत्यशब्दार्थमाह —

तथा दृष्टेनेति ।

सोऽपीत्यपिशब्दो धर्मोदाहरणार्थः ।

द्वयोरपि प्रकारयोर्विनियोगं विभजते —

सामान्यरूप इति ।

उभयत्र समवेतशब्दस्तत्र तत्र कारणत्वेनानुगत्यर्थः ।

यश्चायमस्मिन्नित्यादिवाक्यस्य विषयमाह —

तत्रेति ।

सत्ये यश्चेत्यादि वाक्यमिति शेषः ।

यश्चायमध्यात्ममित्यादिवाक्यस्य विषयमाह —

तथाऽध्यात्ममिति ।

सत्यस्य पृथिव्यादौ कार्यकारणसंघाते च कारणत्वे प्रमाणमाह —

सत्येनेति ॥१२॥