ఇదం సత్యమిత్యస్మిన్పర్యాయే సత్యశబ్దార్థమాహ —
తథా దృష్టేనేతి ।
సోఽపీత్యపిశబ్దో ధర్మోదాహరణార్థః ।
ద్వయోరపి ప్రకారయోర్వినియోగం విభజతే —
సామాన్యరూప ఇతి ।
ఉభయత్ర సమవేతశబ్దస్తత్ర తత్ర కారణత్వేనానుగత్యర్థః ।
యశ్చాయమస్మిన్నిత్యాదివాక్యస్య విషయమాహ —
తత్రేతి ।
సత్యే యశ్చేత్యాది వాక్యమితి శేషః ।
యశ్చాయమధ్యాత్మమిత్యాదివాక్యస్య విషయమాహ —
తథాఽధ్యాత్మమితి ।
సత్యస్య పృథివ్యాదౌ కార్యకారణసంఘాతే చ కారణత్వే ప్రమాణమాహ —
సత్యేనేతి ॥౧౨॥