ಯಸ್ತು ಕಾರ್ಯಕರಣಸಂಘಾತೋ ಮಾನುಷಾದಿಜಾತಿವಿಶಿಷ್ಟಃ, ಸೋಽಯಮಾತ್ಮಾ ಸರ್ವೇಷಾಂ ಭೂತಾನಾಂ ಮಧು । ನನು ಅಯಂ ಶಾರೀರಶಬ್ದೇನ ನಿರ್ದಿಷ್ಟಃ ಪೃಥಿವೀಪರ್ಯಾಯ ಏವ — ನ, ಪಾರ್ಥಿವಾಂಶಸ್ಯೈವ ತತ್ರ ಗ್ರಹಣಾತ್ ; ಇಹ ತು ಸರ್ವಾತ್ಮಾ ಪ್ರತ್ಯಸ್ತಮಿತಾಧ್ಯಾತ್ಮಾಧಿಭೂತಾಧಿದೈವಾದಿಸರ್ವವಿಶೇಷಃ ಸರ್ವಭೂತದೇವತಾಗಣವಿಶಿಷ್ಟಃ ಕಾರ್ಯಕರಣಸಂಘಾತಃ ಸಃ ‘ಅಯಮಾತ್ಮಾ’ ಇತ್ಯುಚ್ಯತೇ । ತಸ್ಮಿನ್ ಅಸ್ಮಿನ್ ಆತ್ಮನಿ ತೇಜೋಮಯೋಽಮೃತಮಯಃ ಪುರುಷಃ ಅಮೂರ್ತರಸಃ ಸರ್ವಾತ್ಮಕೋ ನಿರ್ದಿಶ್ಯತೇ ; ಏಕದೇಶೇನ ತು ಪೃಥಿವ್ಯಾದಿಷು ನಿರ್ದಿಷ್ಟಃ, ಅತ್ರ ಅಧ್ಯಾತ್ಮವಿಶೇಷಾಭಾವಾತ್ ಸಃ ನ ನಿರ್ದಿಶ್ಯತೇ । ಯಸ್ತು ಪರಿಶಿಷ್ಟೋ ವಿಜ್ಞಾನಮಯಃ — ಯದರ್ಥೋಽಯಂ ದೇಹಲಿಂಗಸಂಘಾತ ಆತ್ಮಾ — ಸಃ ‘ಯಶ್ಚಾಯಮಾತ್ಮಾ’ ಇತ್ಯುಚ್ಯತೇ ॥