యస్తు కార్యకరణసఙ్ఘాతో మానుషాదిజాతివిశిష్టః, సోఽయమాత్మా సర్వేషాం భూతానాం మధు । నను అయం శారీరశబ్దేన నిర్దిష్టః పృథివీపర్యాయ ఎవ — న, పార్థివాంశస్యైవ తత్ర గ్రహణాత్ ; ఇహ తు సర్వాత్మా ప్రత్యస్తమితాధ్యాత్మాధిభూతాధిదైవాదిసర్వవిశేషః సర్వభూతదేవతాగణవిశిష్టః కార్యకరణసఙ్ఘాతః సః ‘అయమాత్మా’ ఇత్యుచ్యతే । తస్మిన్ అస్మిన్ ఆత్మని తేజోమయోఽమృతమయః పురుషః అమూర్తరసః సర్వాత్మకో నిర్దిశ్యతే ; ఎకదేశేన తు పృథివ్యాదిషు నిర్దిష్టః, అత్ర అధ్యాత్మవిశేషాభావాత్ సః న నిర్దిశ్యతే । యస్తు పరిశిష్టో విజ్ఞానమయః — యదర్థోఽయం దేహలిఙ్గసఙ్ఘాత ఆత్మా — సః ‘యశ్చాయమాత్మా’ ఇత్యుచ్యతే ॥