ఇదం వై తన్మధ్వితి పూర్వవత్ । ఉక్తౌ ద్వౌ మన్త్రౌ ప్రవర్గ్యసమ్బన్ధ్యాఖ్యాయికోపసంహర్తారౌ ; ద్వయోః ప్రవర్గ్యకర్మార్థయోరధ్యాయయోరర్థ ఆఖ్యాయికాభూతాభ్యాం మన్త్రాభ్యాం ప్రకాశితః । బ్రహ్మవిద్యార్థయోస్త్వధ్యాయయోరర్థ ఉత్తరాభ్యామృగ్భ్యాం ప్రకాశయితవ్య ఇత్యతః ప్రవర్తతే । యత్ కక్ష్యం చ మధు ఉక్తవానాథర్వణో యువాభ్యామిత్యుక్తమ్ — కిం పునస్తన్మధ్విత్యుచ్యతే — పురశ్చక్రే, పురః పురాణి శరీరాణి — యత ఇయమవ్యాకృతవ్యాకరణప్రక్రియా — స పరమేశ్వరో నామరూపే అవ్యాకృతే వ్యాకుర్వాణః ప్రథమం భూరాదీన్ లోకాన్సృష్ట్వా, చక్రే కృతవాన్ , ద్విపదః ద్విపాదుపలక్షితాని మనుష్యశరీరాణి పక్షిశరీరాణి ; తథా పురః శరీరాణి చక్రే చతుష్పదః చతుష్పాదుపలక్షితాని పశుశరీరాణి ; పురః పురస్తాత్ , స ఈశ్వరః పక్షీ లిఙ్గశరీరం భూత్వా పురః శరీరాణి — పురుష ఆవిశదిత్యస్యార్థమాచష్టే శ్రుతిః — స వా అయం పురుషః సర్వాసు పూర్షు సర్వశరీరేషు పురిశయః, పురి శేత ఇతి పురిశయః సన్ పురుష ఇత్యుచ్యతే ; న ఎనేన అనేన కిఞ్చన కిఞ్చిదపి అనావృతమ్ అనాచ్ఛాదితమ్ ; తథా న ఎనేన కిఞ్చనాసంవృతమ్ అన్తరననుప్రవేశితమ్ — బాహ్యభూతేనాన్తర్భూతేన చ న అనావృతమ్ ; ఎవం స ఎవ నామరూపాత్మనా అన్తర్బహిర్భావేన కార్యకరణరూపేణ వ్యవస్థితః ; పురశ్చక్రే ఇత్యాదిమన్త్రః సఙ్క్షేపత ఆత్మైకత్వమాచష్ట ఇత్యర్థః ॥