బ్రహ్మవిద్యాం సంక్షేపవిస్తరాభ్యాం ప్రతిపాద్య వంశబ్రాహ్మణతాత్పర్యమాహ —

అథేతి ।

మహాజనపరిగృహీతా హి బ్రహ్మవిద్యా తేన సా మహాభాగధేయేతి స్తుతిః ।

బ్రాహ్మణస్యార్థాన్తరమాహ —

మన్త్రశ్చేతి ।

స్వాధ్యాయః స్వాధీనోచ్చారణక్షమత్వే సత్యధ్యాపనం జపస్తు ప్రత్యహమావృత్తిరితి భేదః ।

యథోక్తనీత్యా బ్రాహ్మణారమ్భే స్థితే వంశశబ్దార్థమాహ —

తత్రేతి ।

తదేవ స్ఫుటయతి —

యథేతి ।

శిష్యావసానోపలక్షిణీభూతాత్పౌతిమాష్యాదారభ్య తదాదిర్వేదాఖ్యబ్రహ్మమూలపర్యన్తోఽయం వంశః పర్వణః పర్వణో భిద్యత ఇతి సంబన్ధః ।

వంశశబ్దేన నిష్పన్నమర్థమాహ —

అధ్యాయచతుష్టయస్యేతి ।

అథాత్ర శిష్యాచార్యవాచకశబ్దాభావే కుతో వ్యవస్థేతి తత్రాఽఽహ —

తత్రేతి ।

పరమేష్ఠిబ్రహ్మశబ్దయోరేకార్థత్వమాశఙ్క్యాఽఽహ —

పరమేష్ఠీతి ।

కుతస్తర్హి బ్రహ్మణో విద్యాప్రాప్తిస్తత్రాఽఽహ —

తత ఇతి ।

స్వయమ్ప్రతిభాతవేదో హిరణ్యగర్భో నాఽఽచార్యాన్తరమపేక్షతే । ఈస్వరానుగృహీతస్య తస్య, బుద్ధావావిర్భూతాద్వేదాదేవ విద్యాలాభసంభవాదిత్యర్థః ।

కుతస్తర్హి వేదో జాయతే తత్రాఽఽహ —

యత్పునరితి ।

పరస్యైవ బ్రహ్మణో వేదరూపేణావస్థానాత్తస్య నిత్యత్వాన్న హేత్వపేక్షేత్యర్థః ।

ఆదావన్తే చ కృతమఙ్గలా గ్రన్థాః ప్రచారిణో భవన్తీతి ద్యోతయితుమన్తే బ్రహ్మణే నమ ఇత్యుక్తమ్ । తద్వ్యాచష్టే —

తస్మా ఇతి ॥౧–౨–౩॥