ಗಾ ಏವಮವರುಧ್ಯ ಬ್ರಾಹ್ಮಣಾಂಸ್ತಾನ್ಹೋವಾಚ, ಹೇ ಬ್ರಾಹ್ಮಣಾ ಭಗವಂತಃ ಇತ್ಯಾಮಂತ್ರ್ಯ — ಯಃ ವಃ ಯುಷ್ಮಾಕಂ ಬ್ರಹ್ಮಿಷ್ಠಃ — ಸರ್ವೇ ಯೂಯಂ ಬ್ರಹ್ಮಾಣಃ, ಅತಿಶಯೇನ ಯುಷ್ಮಾಕಂ ಬ್ರಹ್ಮಾ ಯಃ — ಸಃ ಏತಾ ಗಾ ಉದಜತಾಮ್ ಉತ್ಕಾಲಯತು ಸ್ವಗೃಹಂ ಪ್ರತಿ । ತೇ ಹ ಬ್ರಾಹ್ಮಣಾ ನ ದಧೃಷುಃ — ತೇ ಹ ಕಿಲ ಏವಮುಕ್ತಾ ಬ್ರಾಹ್ಮಣಾಃ ಬ್ರಹ್ಮಿಷ್ಠತಾಮಾತ್ಮನಃ ಪ್ರತಿಜ್ಞಾತುಂ ನ ದಧೃಷುಃ ನ ಪ್ರಗಲ್ಭಾಃ ಸಂವೃತ್ತಾಃ । ಅಪ್ರಗಲ್ಭಭೂತೇಷು ಬ್ರಾಹ್ಮಣೇಷು ಅಥ ಹ ಯಾಜ್ಞವಲ್ಕ್ಯಃ ಸ್ವಮ್ ಆತ್ಮೀಯಮೇವ ಬ್ರಹ್ಮಚಾರಿಣಮ್ ಅಂತೇವಾಸಿನಮ್ ಉವಾಚ — ಏತಾಃ ಗಾಃ ಹೇ ಸೋಮ್ಯ ಉದಜ ಉದ್ಗಮಯ ಅಸ್ಮದ್ಗೃಹಾನ್ಪ್ರತಿ, ಹೇ ಸಾಮಶ್ರವಃ — ಸಾಮವಿಧಿಂ ಹಿ ಶೃಣೋತಿ, ಅತಃ ಅರ್ಥಾಚ್ಚತುರ್ವೇದೋ ಯಾಜ್ಞವಲ್ಕ್ಯಃ । ತಾಃ ಗಾಃ ಹ ಉದಾಚಕಾರ ಉತ್ಕಾಲಿತವಾನಾಚಾರ್ಯಗೃಹಂ ಪ್ರತಿ । ಯಾಜ್ಞವಲ್ಕ್ಯೇನ ಬ್ರಹ್ಮಿಷ್ಠಪಣಸ್ವೀಕರಣೇನ ಆತ್ಮನೋ ಬ್ರಹ್ಮಿಷ್ಠತಾ ಪ್ರತಿಜ್ಞಾತೇತಿ ತೇ ಹ ಚುಕ್ರುಧುಃ ಕ್ರುದ್ಧವಂತೋ ಬ್ರಾಹ್ಮಣಾಃ । ತೇಷಾಂ ಕ್ರೋಧಾಭಿಪ್ರಾಯಮಾಚಷ್ಟೇ — ಕಥಂ ನಃ ಅಸ್ಮಾಕಮ್ ಏಕೈಕಪ್ರಧಾನಾನಾಂ ಬ್ರಹ್ಮಿಷ್ಠೋಽಸ್ಮೀತಿ ಬ್ರುವೀತೇತಿ । ಅಥ ಹ ಏವಂ ಕ್ರುದ್ಧೇಷು ಬ್ರಾಹ್ಮಣೇಷು ಜನಕಸ್ಯ ಯಜಮಾನಸ್ಯ ಹೋತಾ ಋತ್ವಿಕ್ ಅಶ್ವಲೋ ನಾಮ ಬಭೂವ ಆಸೀತ್ । ಸ ಏವಂ ಯಾಜ್ಞವಲ್ಕ್ಯಮ್ — ಬ್ರಹ್ಮಿಷ್ಠಾಭಿಮಾನೀ ರಾಜಾಶ್ರಯತ್ವಾಚ್ಚ ಧೃಷ್ಟಃ — ಯಾಜ್ಞವಲ್ಕ್ಯಂ ಪಪ್ರಚ್ಛ ಪೃಷ್ಟವಾನ್ ; ಕಥಮ್ ? ತ್ವಂ ನು ಖಲು ನೋ ಯಾಜ್ಞವಲ್ಕ್ಯ ಬ್ರಹ್ಮಿಷ್ಠೋಽಸೀ೩ ಇತಿ — ಪ್ಲುತಿಃ ಭರ್ತ್ಸನಾರ್ಥಾ । ಸ ಹೋವಾಚ ಯಾಜ್ಞವಲ್ಕ್ಯಃ — ನಮಸ್ಕುರ್ಮೋ ವಯಂ ಬ್ರಹ್ಮಿಷ್ಠಾಯ, ಇದಾನೀಂ ಗೋಕಾಮಾಃ ಸ್ಮೋ ವಯಮಿತಿ । ತಂ ಬ್ರಹ್ಮಿಷ್ಠಪ್ರತಿಜ್ಞಂ ಸಂತಂ ತತ ಏವ ಬ್ರಹ್ಮಿಷ್ಠಪಣಸ್ವೀಕರಣಾತ್ ಪ್ರಷ್ಟುಂ ದಧ್ರೇ ಧೃತವಾನ್ಮನೋ ಹೋತಾ ಅಶ್ವಲಃ ॥