ಪ್ರಶ್ನಾಂತರಮವತಾರ್ಯ ತಾತ್ಪರ್ಯಮಾಹ —
ಯಾಜ್ಞವಲ್ಕ್ಯೇತಿ ।
ಆಶ್ರಯಭೂತಾನಿ ಕಾನಿ ತಾನೀತ್ಯಾಶಂಕ್ಯಾಽಽಹ —
ದರ್ಶಪೂರ್ಣಮಾಸಾದೀತಿ ।
ಪ್ರತಿಕ್ಷಣಮನ್ಯಥಾತ್ವಂ ವಿಪರಿಣಾಮಃ । ಅಗ್ನ್ಯಾದಿಸಾಧನಾನ್ಯಾಶ್ರಿತ್ಯ ಕಾಮ್ಯಂ ಕರ್ಮ ಮೃತ್ಯುಶಬ್ದಿತಮುತ್ಪದ್ಯತೇ ತೇಷಾಂ ಸಾಧನಾನಾಂ ವಿಪರಿಣಾಮಹೇತುತ್ವಾತ್ಕಾಲೋ ಮೃತ್ಯುಸ್ತತೋಽತಿಮುಕ್ತಿರ್ವಕ್ತವ್ಯೇತ್ಯುತ್ತರಗ್ರಂಥಾರಂಭ ಇತ್ಯರ್ಥಃ ।
ಕರ್ಮಣೋ ಮುಕ್ತಿರುಕ್ತಾ ಚೇತ್ಕಾಲಾದಪಿ ಸೋಕ್ತೈವ ತಸ್ಯ ಕರ್ಮಾಂತರ್ಭಾವೇನ ಮೃತ್ಯುತ್ವಾದಿತ್ಯಾಶಂಕ್ಯಾಽಽಹ —
ಪೃಥಗಿತಿ ।
ಕರ್ಮನಿರಪೇಕ್ಷತಯಾ ಕಾಲಸ್ಯ ಮೃತ್ಯುತ್ವಂ ವ್ಯುತ್ಪಾದಯತಿ —
ಕ್ರಿಯೇತಿ ।
ಕಾಲಸ್ಯ ಪೃಥಙ್ಮೃತ್ಯುತ್ವೇ ಸಿದ್ಧೇ ಫಲಿತಮಾಹ —
ತಸ್ಮಾದಿತಿ ।
ಉತ್ತರಗ್ರಂಥಸ್ಥಪ್ರಶ್ನಯೋರ್ವಿಷಯಂ ಭೇತ್ತುಂ ಕಾಲಂ ಭಿನತ್ತಿ —
ಸ ಚೇತಿ ।
ಆದಿತ್ಯಶ್ಚಂದ್ರಶ್ಚೇತಿ ಕರ್ತೃಭೇದಾದ್ವೈವಿಧ್ಯಮುನ್ನೇಯಮ್ ।
ಕಾಲಸ್ಯ ದೈರೂಪ್ಯೇ ಸತ್ಯಾದ್ಯಕಂಡಿಕಾವಿಷಯಮಾಹ —
ತತ್ರೇತಿ ।
ಅಹೋರಾತ್ರಯೋರ್ಮೃತ್ಯುತ್ವೇ ಸಿದ್ಧೇ ತಾಭ್ಯಾಮತಿಮುಕ್ತಿರ್ವಕ್ತವ್ಯಾ ತದೇವ ಕಥಮಿತ್ಯಾಶಂಕ್ಯಾಽಽಹ —
ಅಹೋರಾತ್ರಾಭ್ಯಾಮಿತಿ ।
ಯಜ್ಞಸಾಧನಂ ಚ ತಥಾ ತಾಭ್ಯಾಂ ಜಾಯತೇ ವರ್ಧತೇ ನಶ್ಯತಿ ಚೇತಿ ಸಂಬಂಧಃ ।
ಪ್ರತಿವಚನವ್ಯಾಖ್ಯಾನೇ ಯಜ್ಞಶಬ್ದಾರ್ಥಮಾಹ —
ಯಜಮಾನಸ್ಯೇತಿ ।
ಸ ಮುಕ್ತಿರಿತ್ಯಸ್ಯ ತತ್ಪರ್ಯಾರ್ಥಮಾಹ —
ಯಜಮಾನಸ್ಯೇತ್ಯಾದಿನಾ ।
ತಸ್ಯೈವಾಕ್ಷರಾರ್ಥಂ ಕಥಯತಿ —
ಸೋಽಧ್ವರ್ಯುರಿತಿ ।
ಯಥೋಕ್ತರೀತ್ಯಾಽಽದಿತ್ಯಾತ್ಮತ್ವೇಽಪಿ ಕಥಮಹೋರಾತ್ರಲಕ್ಷಣಾನ್ಮೃತ್ಯೋರತಿರಿಮುಕ್ತಿರತ ಆಹ —
ಆದಿತ್ಯೇತಿ ।
’ನೋದೇತಾ ನಾಸ್ತಮೇತಾ’ ಇತ್ಯಾದಿಶ್ರುತೇರಾದಿತ್ಯೇ ವಸ್ತುತೋ ನಾಹೋರಾತ್ರೇ ಸ್ತಃ । ತಥಾ ಚ ತದಾತ್ಮನಿ ವಿದುಷ್ಯಪಿ ನ ತೇ ಸಂಭವತ ಇತ್ಯರ್ಥಃ ॥೪॥