ಯಾಜ್ಞವಲ್ಕ್ಯೇತಿ ಹೋವಾಚ ಅಭಿಮುಖೀಕರಣಾಯ । ಕತಿಭಿರಯಮದ್ಯರ್ಗ್ಭಿರ್ಹೋತಾಸ್ಮಿನ್ಯಜ್ಞೇ — ಕತಿಭಿಃ ಕತಿಸಂಖ್ಯಾಭಿಃ ಋಗ್ಭಿಃ ಋಗ್ಜಾತಿಭಿಃ, ಅಯಂ ಹೋತಾ ಋತ್ವಿಕ್ , ಅಸ್ಮಿನ್ಯಜ್ಞೇ ಕರಿಷ್ಯತಿ ಶಸ್ತ್ರಂ ಶಂಸತಿ ; ಆಹ ಇತರಃ — ತಿಸೃಭಿಃ ಋಗ್ಜಾತಿಭಿಃ — ಇತಿ — ಉಕ್ತವಂತಂ ಪ್ರತ್ಯಾಹ ಇತರಃ — ಕತಮಾಸ್ತಾಸ್ತಿಸ್ರ ಇತಿ ; ಸಂಖ್ಯೇಯವಿಷಯೋಽಯಂ ಪ್ರಶ್ನಃ, ಪೂರ್ವಸ್ತು ಸಂಖ್ಯಾವಿಷಯಃ । ಪುರೋನುವಾಕ್ಯಾ ಚ — ಪ್ರಾಗ್ಯಾಗಕಾಲಾತ್ ಯಾಃ ಪ್ರಯುಜ್ಯಂತೇ ಋಚಃ, ಸಾ ಋಗ್ಜಾತಿಃ ಪುರೋನುವಾಕ್ಯೇತ್ಯುಚ್ಯತೇ ; ಯಾಗಾರ್ಥಂ ಯಾಃ ಪ್ರಯುಜ್ಯಂತೇ ಋಚಃ ಸಾ ಋಗ್ಜಾತಿಃ ಯಾಜ್ಯಾ ; ಶಸ್ತ್ರಾರ್ಥಂ ಯಾಃ ಪ್ರಯುಜ್ಯಂತೇ ಋಚಃ ಸಾ ಋಗ್ಜಾತಿಃ ಶಸ್ಯಾ ; ಸರ್ವಾಸ್ತು ಯಾಃ ಕಾಶ್ಚನ ಋಚಃ, ತಾಃ ಸ್ತೋತ್ರಿಯಾ ವಾ ಅನ್ಯಾ ವಾ ಸರ್ವಾ ಏತಾಸ್ವೇವ ತಿಸೃಷು ಋಗ್ಜಾತಿಷ್ವಂತರ್ಭವಂತಿ । ಕಿಂ ತಾಭಿರ್ಜಯತೀತಿ ಯತ್ಕಿಂಚೇದಂ ಪ್ರಾಣಭೃದಿತಿ — ಅತಶ್ಚ ಸಂಖ್ಯಾಸಾಮಾನ್ಯಾತ್ ಯತ್ಕಿಂಚಿತ್ಪ್ರಾಣಭೃಜ್ಜಾತಮ್ , ತತ್ಸರ್ವಂ ಜಯತಿ ತತ್ಸರ್ವಂ ಫಲಜಾತಂ ಸಂಪಾದಯತಿ ಸಂಖ್ಯಾದಿಸಾಮಾನ್ಯೇನ ॥