ಯಾಜ್ಞವಲ್ಕ್ಯೇತಿ ಹೋವಾಚೇತಿ ಪೂರ್ವವತ್ । ಕತ್ಯಯಮದ್ಯಾಧ್ವರ್ಯುರಸ್ಮಿನ್ಯಜ್ಞ ಆಹುತೀರ್ಹೋಷ್ಯತೀತಿ — ಕತಿ ಆಹುತಿಪ್ರಕಾರಾಃ ? ತಿಸ್ರ ಇತಿ ; ಕತಮಾಸ್ತಾಸ್ತಿಸ್ರ ಇತಿ ಪೂರ್ವವತ್ । ಇತರ ಆಹ — ಯಾ ಹುತಾ ಉಜ್ಜ್ವಲಂತಿ ಸಮಿದಾಜ್ಯಾಹುತಯಃ, ಯಾ ಹುತಾ ಅತಿನೇದಂತೇ ಅತೀವ ಶಬ್ದಂ ಕುರ್ವಂತಿ ಮಾಂಸಾದ್ಯಾಹುತಯಃ, ಯಾ ಹುತಾ ಅಧಿಶೇರತೇ ಅಧಿ ಅಧೋ ಗತ್ವಾ ಭೂಮೇಃ ಅಧಿಶೇರತೇ ಪಯಃಸೋಮಾಹುತಯಃ । ಕಿಂ ತಾಭಿರ್ಜಯತೀತಿ ; ತಾಭಿರೇವಂ ನಿರ್ವರ್ತಿತಾಭಿರಾಹುತಿಭಿಃ ಕಿಂ ಜಯತೀತಿ ; ಯಾ ಆಹುತಯೋ ಹುತಾ ಉಜ್ಜ್ವಲಂತಿ ಉಜ್ಜ್ವಲನಯುಕ್ತಾ ಆಹುತಯೋ ನಿರ್ವರ್ತಿತಾಃ — ಫಲಂ ಚ ದೇವಲೋಕಾಖ್ಯಂ ಉಜ್ಜ್ವಲಮೇವ ; ತೇನ ಸಾಮಾನ್ಯೇನ ಯಾ ಮಯೈತಾ ಉಜ್ಜ್ವಲಂತ್ಯ ಆಹುತಯೋ ನಿರ್ವರ್ತ್ಯಮಾನಾಃ, ತಾ ಏತಾಃ — ಸಾಕ್ಷಾದ್ದೇವಲೋಕಸ್ಯ ಕರ್ಮಫಲಸ್ಯ ರೂಪಂ ದೇವಲೋಕಾಖ್ಯಂ ಫಲಮೇವ ಮಯಾ ನಿರ್ವರ್ತ್ಯತೇ — ಇತ್ಯೇವಂ ಸಂಪಾದಯತಿ । ಯಾ ಹುತಾ ಅತಿನೇದಂತೇ ಆಹುತಯಃ, ಪಿತೃಲೋಕಮೇವ ತಾಭಿರ್ಜಯತಿ, ಕುತ್ಸಿತಶಬ್ದಕರ್ತೃತ್ವಸಾಮಾನ್ಯೇನ ; ಪಿತೃಲೋಕಸಂಬದ್ಧಾಯಾಂ ಹಿ ಸಂಯಮಿನ್ಯಾಂ ಪುರ್ಯಾಂ ವೈವಸ್ವತೇನ ಯಾತ್ಯಮಾನಾನಾಂ ‘ಹಾ ಹತಾಃ ಸ್ಮ, ಮುಂಚ ಮುಂಚ’ ಇತಿ ಶಬ್ದೋ ಭವತಿ ; ತಥಾ ಅವದಾನಾಹುತಯಃ ; ತೇನ ಪಿತೃಲೋಕಸಾಮಾನ್ಯಾತ್ , ಪಿತೃಲೋಕ ಏವ ಮಯಾ ನಿರ್ವರ್ತ್ಯತೇ - ಇತಿ ಸಂಪಾದಯತಿ । ಯಾ ಹುತಾ ಅಧಿಶೇರತೇ, ಮನುಷ್ಯಲೋಕಮೇವ ತಾಭಿರ್ಜಯತಿ, ಭೂಮ್ಯುಪರಿಸಂಬಂಧಸಾಮಾನ್ಯಾತ್ ; ಅಧ ಇವ ಹಿ ಅಧ ಏವ ಹಿ ಮನುಷ್ಯಲೋಕ ಉಪರಿತನಾನ್ ಸಾಧ್ಯಾನ್ ಲೋಕಾನಪೇಕ್ಷ್ಯ, ಅಥವಾ ಅಧೋಗಮನಮಪೇಕ್ಷ್ಯ ; ಅತಃ ಮನುಷ್ಯಲೋಕ ಏವ ಮಯಾ ನಿರ್ವರ್ತ್ಯತೇ — ಇತಿ ಸಂಪಾದಯತಿ ಪಯಃಸೋಮಾಹುತಿನಿರ್ವರ್ತನಕಾಲೇ ॥