యాజ్ఞవల్క్యేతి హోవాచేతి పూర్వవత్ । కత్యయమద్యాధ్వర్యురస్మిన్యజ్ఞ ఆహుతీర్హోష్యతీతి — కతి ఆహుతిప్రకారాః ? తిస్ర ఇతి ; కతమాస్తాస్తిస్ర ఇతి పూర్వవత్ । ఇతర ఆహ — యా హుతా ఉజ్జ్వలన్తి సమిదాజ్యాహుతయః, యా హుతా అతినేదన్తే అతీవ శబ్దం కుర్వన్తి మాంసాద్యాహుతయః, యా హుతా అధిశేరతే అధి అధో గత్వా భూమేః అధిశేరతే పయఃసోమాహుతయః । కిం తాభిర్జయతీతి ; తాభిరేవం నిర్వర్తితాభిరాహుతిభిః కిం జయతీతి ; యా ఆహుతయో హుతా ఉజ్జ్వలన్తి ఉజ్జ్వలనయుక్తా ఆహుతయో నిర్వర్తితాః — ఫలం చ దేవలోకాఖ్యం ఉజ్జ్వలమేవ ; తేన సామాన్యేన యా మయైతా ఉజ్జ్వలన్త్య ఆహుతయో నిర్వర్త్యమానాః, తా ఎతాః — సాక్షాద్దేవలోకస్య కర్మఫలస్య రూపం దేవలోకాఖ్యం ఫలమేవ మయా నిర్వర్త్యతే — ఇత్యేవం సమ్పాదయతి । యా హుతా అతినేదన్తే ఆహుతయః, పితృలోకమేవ తాభిర్జయతి, కుత్సితశబ్దకర్తృత్వసామాన్యేన ; పితృలోకసమ్బద్ధాయాం హి సంయమిన్యాం పుర్యాం వైవస్వతేన యాత్యమానానాం ‘హా హతాః స్మ, ముఞ్చ ముఞ్చ’ ఇతి శబ్దో భవతి ; తథా అవదానాహుతయః ; తేన పితృలోకసామాన్యాత్ , పితృలోక ఎవ మయా నిర్వర్త్యతే - ఇతి సమ్పాదయతి । యా హుతా అధిశేరతే, మనుష్యలోకమేవ తాభిర్జయతి, భూమ్యుపరిసమ్బన్ధసామాన్యాత్ ; అధ ఇవ హి అధ ఎవ హి మనుష్యలోక ఉపరితనాన్ సాధ్యాన్ లోకానపేక్ష్య, అథవా అధోగమనమపేక్ష్య ; అతః మనుష్యలోక ఎవ మయా నిర్వర్త్యతే — ఇతి సమ్పాదయతి పయఃసోమాహుతినిర్వర్తనకాలే ॥