ಬ್ರಾಹ್ಮಣಾಂತರಮವತಾರ್ಯ ವೃತ್ತಂ ಕೀರ್ತಯತಿ —
ಅಥೇತ್ಯಾದಿನಾ ।
ಉಕ್ತಮೇವ ತಸ್ಯ ಮೃತ್ಯುತ್ವಂ ವ್ಯಕ್ತೀಕರೋತಿ —
ಯಸ್ಮಾದಿತಿ ।
ಅಗ್ನಿರ್ವೈ ಮೃತ್ಯುರಿತ್ಯಾದಾವುಕ್ತಂ ಸ್ಮಾರಯತಿ —
ತಸ್ಮಾದಿತಿ ।
ಯತ್ರಾಯಮಿತ್ಯಾದಾವುಕ್ತಮನುದ್ರವತಿ —
ಮುಕ್ತಸ್ಯ ಚೇತಿ ।
ಯತ್ರಾಸ್ಯೇತ್ಯಾದೌ ನಿರ್ಣೀತಮನುಭಾಷತೇ —
ತತ್ರೇತಿ ।
ಪೂರ್ವಬ್ರಾಹ್ಮಣಸ್ಥೋ ಗ್ರಂಥಃ ಸಪ್ತಮ್ಯರ್ಥಃ । ತಸ್ಯ ಚಾವಧಾರಿತಮಿತ್ಯನೇನ ಸಂಬಂಧಃ । ಸಂಸರತಾಂ ಮುಚ್ಯಮಾನಾನಾಂ ಚ ಯಾನಿ ಕಾರ್ಯಕರಣಾನಿ ತೇಷಾಮಿತಿ ವೈಯಧಿಕರಣ್ಯಮ್ । ಅನುಪಾದಾನಮುಪಾದಾನಮಿತ್ಯುಭಯತ್ರ ಕಾರ್ಯಕರಣಾನಾಮಿತಿ ಸಂಬಂಧಃ ।
ಕರ್ಮಣೋ ಭಾವಾಭಾವಾಭ್ಯಾಂ ಬಂಧಮೋಕ್ಷಾವುಕ್ತೌ ತತ್ರಾಭಾವದ್ವಾರಾ ಕರ್ಮಣೋ ಮೋಕ್ಷಹೇತುತ್ವಂ ಸ್ಫುಟಯತಿ —
ತತ್ಕ್ಷಯೇ ಚೇತಿ ।
ತಸ್ಯ ಭಾವದ್ವಾರಾ ಬಂಧಹೇತುತ್ವಂ ಪ್ರಕಟಯತಿ —
ತಚ್ಚೇತಿ ।
ಪುಣ್ಯಪಾಪಯೋರುಭಯೋರಪಿ ಸಂಸಾರಫಲತ್ವಾವಿಶೇಷಾತ್ಪುಣ್ಯಫಲವತ್ಪಾಪಫಲಮಪ್ಯತ್ರ ವಕ್ತವ್ಯಮನ್ಯಥಾ ತತೋ ವಿರಾಗಾಯೋಗಾದಿತ್ಯಾಶಂಕ್ಯ ವರ್ತಿಷ್ಯಮಾಣಸ್ಯ ತಾತ್ಪರ್ಯಂ ವಕ್ತುಂ ಭೂಮಿಕಾಂ ಕರೋತಿ —
ತತ್ರೇತಿ ।
ಪುಣ್ಯೇಷ್ವಪುಣ್ಯೇಷು ಚ ನಿರ್ಧಾರಣಾರ್ಥಾ ಸಪ್ತಮೀ । ಸ್ವಭಾವದುಃಖಬಹುಲೇಷ್ವಿತ್ಯುಭಯತಃ ಸಂಬಧ್ಯತೇ । ತರ್ಹಿ ಪುಣ್ಯಫಲಮಪಿ ಸರ್ವಲೋಕಪ್ರಸಿದ್ಧತ್ವಾನ್ನಾತ್ರ ವಕ್ತವ್ಯಮಿತ್ಯಾಶಂಕ್ಯಾಽಽಹ —
ಯಸ್ತ್ವಿತಿ ।
ಶಾಸ್ತ್ರೀಯಂ ಸುಖಾನುಭವಮಿತಿ ಶೇಷಃ ।
ಇಹೇತಿ ಬ್ರಾಹ್ಮಣೋಕ್ತಿಃ ಶಾಸ್ತ್ರೀಯಂ ಕರ್ಮ ಸರ್ವಮಪಿ ಸಂಸಾರಫಲಮೇವೇತಿ ವಕ್ತುಂ ಬ್ರಾಹ್ಮಣಮಿತ್ಯುಕ್ತ್ವಾ ಶಂಕೋತ್ತರತ್ವೇನಾಪಿ ತದವತಾರಯತಿ —
ಪುಣ್ಯಮೇವೇತ್ಯಾದಿನಾ ।
ಮೋಕ್ಷಸ್ಯ ಪುಣ್ಯಸಾಧ್ಯತ್ವಂ ವಿಧಾಂತರೇಣ ಸಾಧಯತಿ —
ಯಾವದ್ಯಾವದಿತಿ ।
ಕಥಂ ತಸ್ಯಾ ನಿವರ್ತನಮಿತ್ಯಾಶಂಕ್ಯಾಽಽಹ —
ಜ್ಞಾನಸಹಿತಸ್ಯೇತಿ ।
ಸಮುಚ್ಚಿತಮಪಿ ಕರ್ಮ ಸಂಸಾರಫಲಮೇವೇತ್ಯತ್ರ ಹೇತುಮಾಹ —
ವ್ಯಾಕೃತೇತಿ ।
ಮೋಕ್ಷೇಽಪಿ ಸ್ವರ್ಗಾದಾವಿವ ಪುರುಷಾರ್ಥತ್ವಾವಿಶೇಷಾತ್ಕರ್ಮಣೋ ವ್ಯಾಪಾರಃ ಸ್ಯಾದಿತ್ಯಾಶಂಕ್ಯಾಽಽಹ —
ನ ತ್ವಿತಿ ।
ಅಕಾರ್ಯತ್ವಮುತ್ಪತ್ತಿಹೀನತ್ವಮ್ । ನಿತ್ಯತ್ವಂ ನಾಶಶೂನ್ಯತ್ವಮ್ । ಅವ್ಯಾಕೃತಧರ್ಮಿತ್ವಂ ವ್ಯಾಕೃತನಾಮರೂಪರಾಹಿತ್ಯಮ್ ।
’ಅಶಬ್ದಮಸ್ಪರ್ಶಮ್’ ಇತ್ಯಾದಿ ಶ್ರುತಿಮಾಶ್ರಿತ್ಯಾಽಽಹ —
ಅನಾಮೇತಿ ।
’ನಿಷ್ಕಲಂ ನಿಷ್ಕ್ರಿಯಮ್’ ಇತ್ಯಾದಿಶ್ರುತಿಮಾಶ್ರಿತ್ಯಾಽಽಹ —
ಕ್ರಿಯೇತಿ ।
ಚತುರ್ವಿಧಕ್ರಿಯಾಫಲವಿಲಕ್ಷಣೇ ಮೋಕ್ಷೇ ಕರ್ಮಣೋ ವ್ಯಾಪಾರೋ ನ ಸಂಭವತೀತಿ ಭಾವಃ ।
ನನ್ವಾ ಸ್ಥಾಣೋರಾ ಚ ಪ್ರಜಾಪತೇಃ ಸರ್ವತ್ರ ಕರ್ಮವ್ಯಾಪಾರಾತ್ಕಥಂ ಮೋಕ್ಷೇ ಪ್ರಜಾಪತಿಭಾವಲಕ್ಷಣೇ ತದ್ವ್ಯಾಪಾರೋ ನಾಸ್ತಿ ತತ್ರಾಽಽಹ —
ಯತ್ರ ಚೇತಿ ।
ಕರ್ಮಫಲಸ್ಯ ಸರ್ವಸ್ಯ ಸಂಸಾರತ್ವಮೇವೇತಿ ಕುತಃ ಸಿಧ್ಯತಿ ತತ್ರಾಽಽಹ —
ಇತ್ಯಸ್ಯೇತಿ ।