ಮದ್ರೇಷು — ಮದ್ರಾ ನಾಮ ಜನಪದಾಃ ತೇಷು, ಚರಕಾಃ — ಅಧ್ಯಯನಾರ್ಥಂ ವ್ರತಚರಣಾಚ್ಚರಕಾಃ ಅಧ್ವರ್ಯವೋ ವಾ, ಪರ್ಯವ್ರಜಾಮ ಪರ್ಯಟಿತವಂತಃ ; ತೇ ಪತಂಜಲಸ್ಯ — ತೇ ವಯಂ ಪರ್ಯಟಂತಃ, ಪತಂಜಲಸ್ಯ ನಾಮತಃ, ಕಾಪ್ಯಸ್ಯ ಕಪಿಗೋತ್ರಸ್ಯ, ಗೃಹಾನ್ ಐಮ ಗತವಂತಃ ; ತಸ್ಯಾಸೀದ್ದುಹಿತಾ ಗಂಧರ್ವಗೃಹೀತಾ — ಗಂಧರ್ವೇಣ ಅಮಾನುಷೇಣ ಸತ್ತ್ವೇನ ಕೇನಚಿತ್ ಆವಿಷ್ಟಾ ; ಗಂಧರ್ವೋ ವಾ ಧಿಷ್ಣ್ಯೋಽಗ್ನಿಃ ಋತ್ವಿಕ್ ದೇವತಾ ವಿಶಿಷ್ಟವಿಜ್ಞಾನತ್ವಾತ್ ಅವಸೀಯತೇ ; ನ ಹಿ ಸತ್ತ್ವಮಾತ್ರಸ್ಯ ಈದೃಶಂ ವಿಜ್ಞಾನಮುಪಪದ್ಯತೇ । ತಂ ಸರ್ವೇ ವಯಂ ಪರಿವಾರಿತಾಃ ಸಂತಃ ಅಪೃಚ್ಛಾಮ — ಕೋಽಸೀತಿ — ಕಸ್ತ್ವಮಸಿ ಕಿನ್ನಾಮಾ ಕಿಂಸತತ್ತ್ವಃ । ಸೋಽಬ್ರವೀದ್ಗಂಧರ್ವಃ — ಸುಧನ್ವಾ ನಾಮತಃ, ಆಂಗಿರಸೋ ಗೋತ್ರತಃ । ತಂ ಯದಾ ಯಸ್ಮಿನ್ಕಾಲೇ ಲೋಕಾನಾಮ್ ಅಂತಾನ್ ಪರ್ಯವಸಾನಾನಿ ಅಪೃಚ್ಛಾಮ, ಅಥ ಏನಂ ಗಂಧರ್ವಮ್ ಅಬ್ರೂಮ — ಭುವನಕೋಶಪರಿಮಾಣಜ್ಞಾನಾಯ ಪ್ರವೃತ್ತೇಷು ಸರ್ವೇಷು ಆತ್ಮಾನಂ ಶ್ಲಾಘಯಂತಃ ಪೃಷ್ಟವಂತೋ ವಯಮ್ ; ಕಥಮ್ ? ಕ್ವ ಪಾರಿಕ್ಷಿತಾ ಅಭವನ್ನಿತಿ । ಸ ಚ ಗಂಧರ್ವಃ ಸರ್ವಮಸ್ಮಭ್ಯಮಬ್ರವೀತ್ । ತೇನ ದಿವ್ಯೇಭ್ಯೋ ಮಯಾ ಲಬ್ಧಂ ಜ್ಞಾನಮ್ ; ತತ್ ತವ ನಾಸ್ತಿ ; ಅತೋ ನಿಗೃಹೀತೋಽಸಿ’ — ಇತ್ಯಭಿಪ್ರಾಯಃ । ಸೋಽಹಂ ವಿದ್ಯಾಸಂಪನ್ನೋ ಲಬ್ಧಾಗಮೋ ಗಂಧರ್ವಾತ್ ತ್ವಾ ತ್ವಾಮ್ ಪೃಚ್ಛಾಮಿ ಯಾಜ್ಞವಲ್ಕ್ಯ — ಕ್ವ ಪಾರಿಕ್ಷಿತಾ ಅಭವನ್ — ತತ್ ತ್ವಂ ಕಿಂ ಜಾನಾಸಿ ? ಹೇ ಯಾಜ್ಞವಲ್ಕ್ಯ, ಕಥಯ, ಪೃಚ್ಛಾಮಿ — ಕ್ವ ಪಾರಿಕ್ಷಿತಾ ಅಭವನ್ನಿತಿ ॥