‘అగ్నిర్వై దేవానాం హోతా’ ఇతి శ్రుతిమాశ్రిత్యాఽఽహ —
ఋత్విగితి ।
యథోక్తగన్ధర్వశబ్దార్థసంగ్రహే లిఙ్గమాహ —
విశిష్టేతి ।
తస్యాన్యథాసిద్ధిం దూషయతి —
న హీతి ।
అథైనమిత్యాదేరర్థం వివృణోతి —
భువనేతి ।
భవత్వేవం గన్ధర్వం ప్రతి భవతః ప్రశ్నస్తథాఽపి కిమాయాతం తదాహ —
స చేతి ।
తేన గన్ధర్వవచనేనేతి యావత్ । దివ్యేభ్యో గన్ధర్వేభ్యః సకాశాదిత్యేతత్ ।
ఎతజ్జ్ఞానాభావే త్వజ్ఞానమప్రతిభా బ్రహ్మిష్ఠత్వప్రతిజ్ఞాహానిశ్చేత్యాహ —
అత ఇతి ।
ప్రష్టురభిప్రాయముక్త్వా ప్రశ్నాక్షరాణి వ్యాచష్టే —
సోఽహమితి ।
ప్రథమా తావత్క్వ పారిక్షితా అభవన్నిత్యుక్తిర్గన్ధర్వప్రశ్నార్థా । ద్వితీయా తదనురూపప్రతివచనార్థా । యో హి క్వ పారిక్షితా అభవన్నితి ప్రశ్నో గన్ధర్వం ప్రతి కృతస్తస్య ప్రత్యుక్తిం సర్వాం సోఽస్మభ్యమబ్రవీదితి తత్ర వివక్ష్యతే । తృతీయా తు మునిం ప్రతి ప్రశ్నార్థేతి విభాగః ॥౧॥