లబ్ధానుజ్ఞా హ యాజ్ఞవల్క్యం సా హ ఉవాచ — అహం వై త్వా త్వామ్ ద్వౌ ప్రశ్నౌ ప్రక్ష్యామీత్యనుషజ్యతే ; కౌ తావితి జిజ్ఞాసాయాం తయోర్దురుత్తరత్వం ద్యోతయితుం దృష్టాన్తపూర్వకం తావాహ — హే యాజ్ఞవల్క్య యథా లోకే కాశ్యః — కాశిషు భవః కాశ్యః, ప్రసిద్ధం శౌర్యం కాశ్యే — వైదేహో వా విదేహానాం వా రాజా, ఉగ్రపుత్రః శూరాన్వయ ఇత్యర్థః, ఉజ్జ్యమ్ అవతారితజ్యాకమ్ ధనుః పునరధిజ్యమ్ ఆరోపితజ్యాకం కృత్వా, ద్వౌ బాణవన్తౌ — బాణశబ్దేన శరాగ్రే యో వంశఖణ్డః సన్ధీయతే, తేన వినాపి శరో భవతీత్యతో విశినష్టి బాణవన్తావితి — ద్వౌ బాణవన్తౌ శరౌ, తయోరేవ విశేషణమ్ — సపత్నాతివ్యాధినౌ శత్రోః పీడాకరావతిశయేన, హస్తే కృత్వా ఉప ఉత్తిష్ఠేత్ సమీపత ఆత్మానం దర్శయేత్ — ఎవమేవ అహం త్వా త్వామ్ శరస్థానీయాభ్యాం ప్రశ్నాభ్యాం ద్వాభ్యామ్ ఉపోదస్థాం ఉత్థితవత్యస్మి త్వత్సమీపే । తౌ మే బ్రూహీతి — బ్రహ్మవిచ్చేత్ । ఆహ ఇతరః — పృచ్ఛ గార్గీతి ॥