ಬೃಹದಾರಣ್ಯಕೋಪನಿಷದ್ಭಾಷ್ಯಮ್
ತೃತೀಯೋಽಧ್ಯಾಯಃಅಷ್ಟಮಂ ಬ್ರಾಹ್ಮಣಮ್
ಪೂರ್ವಪೃಷ್ಠಮ್      ಉತ್ತರಪೃಷ್ಠಮ್
ಆನಂದಗಿರಿಟೀಕಾ (ಬೃಹದಾರಣ್ಯಕ)
 
ಸಾ ಹೋವಾಚ ಯದೂರ್ಧ್ವಂ ಯಾಜ್ಞವಲ್ಕ್ಯ ದಿವೋ ಯದವಾಕ್ಪೃಥಿವ್ಯಾ ಯದಂತರಾ ದ್ಯಾವಾಪೃಥಿವೀ ಇಮೇ ಯದ್ಭೂತಂ ಚ ಭವಚ್ಚ ಭವಿಷ್ಯಚ್ಚೇತ್ಯಾಚಕ್ಷತೇ ಕಸ್ಮಿಂಸ್ತದೋತಂ ಚ ಪ್ರೋತಂ ಚೇತಿ ॥ ೬ ॥
ವ್ಯಾಖ್ಯಾತಮನ್ಯತ್ । ಸಾ ಹೋವಾಚ ಯದೂರ್ಧ್ವಂ ಯಾಜ್ಞವಲ್ಕ್ಯೇತ್ಯಾದಿಪ್ರಶ್ನಃ ಪ್ರತಿವಚನಂ ಚ ಉಕ್ತಸ್ಯೈವಾರ್ಥಸ್ಯಾವಧಾರಣಾರ್ಥಂ ಪುನರುಚ್ಯತೇ ; ನ ಕಿಂಚಿದಪೂರ್ವಮರ್ಥಾಂತರಮುಚ್ಯತೇ ॥

ವಕ್ಷ್ಯಮಾಣಂ ವಾಕ್ಯಮನ್ಯದಿತ್ಯುಚ್ಯತೇ । ತದೇವ ಪ್ರಶ್ನಪ್ರತಿವಚನರೂಪಮನುವದತಿ —

ಸಾ ಹೇತಿ ।

ಪುನರುಕ್ತೇರಕಿಂಚಿತ್ಕರತ್ವಂ ವ್ಯಾವರ್ತಯತಿ —

ಉಕ್ತಸ್ಯೈವೇತಿ ॥೬॥