ಅಥ ಯಥೋಕ್ತಯಾ ನೀತ್ಯಾ ಶ್ರುತ್ಯೈವಾಕ್ಷರಾಸ್ತಿತ್ವೇ ಜ್ಞಾಪಿತೇ ವಕ್ತವ್ಯಾಭಾವಾತ್ಕಿಮುತ್ತರೇಣ ಗ್ರಂಥೇನೇತಿ ತತ್ರಾಽಽಹ —
ಅನೇಕೇತಿ ।
ಯದಸ್ತಿ ತತ್ಸವಿಶೇಷಣಮೇವೇತಿ ಲೌಕಿಕೀ ಬುದ್ಧಿಃ । ಆಶಂಕ್ಯತೇ ನಾಸ್ತ್ಯಕ್ಷರಂ ನಿರ್ವಿಶೇಷಣಮಿತಿ ಶೇಷಃ । ಅಂತರ್ಯಾಮಿಣಿ ಜಗತ್ಕಾರಣೇ ಪರಸ್ಮಿನ್ನನುಮಾನಸಿದ್ಧೇ ವಿವಕ್ಷಿತಂ ನಿರುಪಾಧ್ಯಕ್ಷರಂ ಸೇತ್ಸ್ಯತಿ ಜಗತ್ಕಾರಣತ್ವಸ್ಯೋಪಲಕ್ಷಣತಯಾ ಜನ್ಮಾದಿಸೂತ್ರೇ ಸ್ಥಿತತ್ವಾದುಪಲಕ್ಷಣದ್ವಾರಾ ಬ್ರಹ್ಮಣಿ ಸ್ವರೂಪಲಕ್ಷಣಪ್ರವೃತ್ತೇರಂತರ್ಯಾಮಿಣ್ಯನುಮಾ ಪ್ರಕೃತೋಪಯುಕ್ತೇತಿ ಭಾವಃ ।
ಅನುಮಾನಶ್ರುತ್ಯಕ್ಷರಾಣಿ ವ್ಯಾಕರೋತಿ —
ಯದೇತದಿತಿ ।
ಪ್ರಶಾಸನೇ ಸೂರ್ಯಾಚಂದ್ರಮಸೌ ವಿಧೃತೌ ಸ್ಯಾತಾಮಿತಿ ಸಂಬಂಧಃ ।
ಉಕ್ತಮರ್ಥಂ ದೃಷ್ಟಾಂತೇನ ಸ್ಫೋರಯತಿ —
ಯಥೇತಿ ।
ಅತ್ರಾಪಿ ಪೂರ್ವವದನ್ವಯಃ । ಜಗದ್ವ್ಯವಸ್ಥಾ ಪ್ರಶಾಸಿತೃಪೂರ್ವಿಕಾ ವ್ಯವಸ್ಥಾತ್ವಾದ್ರಾಜ್ಯವ್ಯವಸ್ಥಾವದಿತ್ಯರ್ಥಃ ।
ಸೂರ್ಯಾಚಂದ್ರಮಸಾವಿತ್ಯಾದೌ ವಿವಕ್ಷಿತಮನುಮಾನಮಾಹ —
ಸೂರ್ಯಶ್ಚೇತ್ಯಾದಿನಾ ।
ತಾದರ್ಥ್ಯೇನ ಲೋಕಪ್ರಕಾಶಾರ್ಥತ್ವೇನ । ಪ್ರಶಾಸಿತ್ರಾ ನಿರ್ಮಿತಾವಿತಿ ಸಂಬಂಧಃ ।
ನಿರ್ಮಾತುರ್ವಿಶಿಷ್ಟವಿಜ್ಞಾನವತ್ತ್ವಮಾಚಷ್ಟೇ —
ತಾಭ್ಯಾಂ ನಿರ್ವರ್ತ್ಯಮಾನೇತಿ ।
ಸೂರ್ಯಚಂದ್ರಮಸೌ ತಚ್ಛಬ್ದವಾಚ್ಯೌ । ವಿಮತೌ ವಿಶಿಷ್ಟವಿಜ್ಞಾನವತಾ ನಿರ್ಮಿತೌ ಪ್ರಕಾಶತ್ವಾತ್ಪ್ರದೀಪವದಿತ್ಯರ್ಥಃ ।
ವಿಮತೌ ನಿಯಂತೃಪೂರ್ವಕೌ ವಿಶಿಷ್ಟಚೇಷ್ಟಾವತ್ತ್ವಾದ್ಭೃತ್ಯಾದಿವದಿತ್ಯಭಿಪ್ರೇತ್ಯಾಽಽಹ —
ವಿಧೃತಾವಿತಿ ।
ಪ್ರಕಾಶೋಪಕಾರಕತ್ವಂ ತಜ್ಜನಕತ್ವಂ ನಿರ್ಮಾತುರ್ವಿಶಿಷ್ಟವಿಜ್ಞಾನಸಂಭಾವನಾರ್ಥಂ ಸಾಧಾರಣೇತಿ ವಿಶೇಷಣಂ ಸಾಧಾರಣಃ ಸರ್ವೇಷಾಂ ಪ್ರಾಣಿನಾಂ ಯಃ ಪ್ರಕಾಶಸ್ತಸ್ಯ ಜನಕತ್ವಾದಿತಿ ಯಾವತ್ । ದೃಷ್ಟಾಂತೇ ಲೌಕಿಕವಿಶೇಷಣಂ ಪ್ರಾಸಾದಾದಿವಿಶಿಷ್ಟದೇಶನಿವಿಷ್ಟತ್ವಸಿದ್ಧ್ಯರ್ಥಮ್ ।
ಅನುಮಾನಫಲಮುಪಸಂಹರತಿ —
ತಸ್ಮಾದಿತಿ ।
ವಿಶಿಷ್ಟಚೇಷ್ಟಾವತ್ತ್ವಾದಿತ್ಯುಪದಿಷ್ಟಂ ಹೇತುಂ ಸ್ಪಷ್ಟಯತಿ —
ನಿಯತೇತಿ ।
ನಿಯತೌ ದೇಶಕಾಲೌ ನಿಯತಂ ಚ ನಿಮಿತ್ತಂ ಪ್ರಾಣ್ಯದೃಷ್ಟಂ ತದ್ವಂತೌ ಸೂರ್ಯಾಚಂದ್ರಮಸಾವುದ್ಯಂತಾವಸ್ತಂ ಯಂತೌ ಚ ಯೇನ ವಿಧೃತಾವುದಯಾಸ್ತಮಯಾಭ್ಯಾಂ ವೃದ್ಧಿಕ್ಷಯಾಭ್ಯಾಂ ಚ ವರ್ತೇತೇ । ಉದಯಶ್ಚಾಸ್ತಮಯಶ್ಚೋದಯಾಸ್ತಮಯಂ ವೃದ್ಧಿಶ್ಚ ಕ್ಷಯಶ್ಚ ವೃದ್ಧಿಕ್ಷಯಮಿತಿ ದ್ವಂದ್ವಂ ಗೃಹೀತ್ವಾ ದ್ವಿವಚನಮ್ । ಏವಂ ಕರ್ತೃತ್ವೇನ ವಿಧಾರಯಿತೃತ್ವೇನ ಚೇತ್ಯರ್ಥಃ ।
ವಿಮತೇ ಪ್ರಯತ್ನವತಾ ವಿಧೃತೇ ಸಾವಯವತ್ವೇಽಪ್ಯಸ್ಫುಟಿತತ್ವಾದ್ಗುರುತ್ವೇಽಪ್ಯಪತಿತತ್ವಾತ್ಸಂಯುಕ್ತತ್ವೇಽಪ್ಯವಿಯುಕ್ತತ್ವಾಚ್ಚೇತನಾವತ್ತ್ವೇಽಪ್ಯಸ್ವತಂತ್ರತ್ವಾಚ್ಚ ಹಸ್ತನ್ಯಸ್ತಪಾಷಾಣಾದಿವದಿತಿ ದ್ವಿತೀಯಪರ್ಯಾಯಸ್ಯ ತಾತ್ಪರ್ಯಮಾಹ —
ಸಾವಯವತ್ತ್ವಾದಿತ್ಯಾದಿನಾ ।
ಕಿಮಿತ್ಯೇತಸ್ಯ ಪ್ರಶಾಸನೇ ದ್ಯಾವಾಪೃಥಿವ್ಯೌ ವರ್ತೇತೇ ತತ್ರಾಽಽಹ —
ಏತದ್ಧೀತಿ ।
ಪೃಥಿವ್ಯಾದಿವ್ಯವಸ್ಥಾ ನಿಯಂತಾರಂ ವಿನಾಽನುಪಪನ್ನಾ ತತ್ಕಲ್ಪಿಕೇತ್ಯರ್ಥಃ ।
ತಥಾಽಪಿ ಕಿಮಿತ್ಯೇತೇನ ವಿಧೃತೇ ದ್ಯಾವಾಪೃಥಿವ್ಯಾವಿತಿ ತತ್ರಾಽಽಹ —
ಸರ್ವಮರ್ಯಾದೇತಿ ।
‘ಏಷ ಸೇತುರ್ವಿಧರಣಃ’ ಇತಿ ಶ್ರುತ್ಯಂತರಮಾಶ್ರಿತ್ಯ ಫಲಿತಮಾಹ —
ಅತೋನಾಸ್ಯೇತಿ ।
ದ್ವಿತೀಯಪರ್ಯಾಯಾರ್ಥಮುಪಸಂಹರತಿ —
ತಸ್ಮಾದಿತಿ ।
ತಚ್ಛಬ್ದೋಪಾತ್ತಮರ್ಥಂ ಸ್ಫೋರಯತಿ —
ಅವ್ಯಭಿಚಾರೀತಿ ।
ಅವ್ಯಭಿಚಾರಿತ್ವಂ ಪ್ರಕಟಯತಿ —
ಚೇತನಾವಂತಮಿತಿ ।
ಪೃಥಿವ್ಯಾದೇರ್ನಿಯತತ್ವಮೇತಚ್ಛಬ್ದಾರ್ಥಃ ।
ನಿಯಂತೃಸಿದ್ಧಾವಪಿ ಕಥಮೀಶ್ವರಸಿದ್ಧಿರಿತ್ಯಾಶಂಕ್ಯಾಽಽಹ —
ಯೇನೇತಿ ।
ಉಗ್ರತ್ವಂ ಪೃಥಿವ್ಯಾದೇಶ್ಚೇತನಾವದಭಿಮಾನಿದೇವತಾವತ್ತ್ವೇನ ಸ್ವಾತಂತ್ರ್ಯಮ್ । ‘ಯೇನ ಸ್ವಸ್ತಭಿತಂ ಯೇನ ನಾಕೋ ಯೋ ಅಂತರಿಕ್ಷೇ ರಜಸೋ ವಿಮಾನಃ ಕಸ್ಮೈ ದೇವಾಯ ಹವಿಷಾ ವಿಧೇಮ’ ಇತ್ಯತ್ರ ಹಿರಣ್ಯಗರ್ಭಾಧಿಷ್ಠಾತೇಶ್ವರಃ ಪೃಥಿವ್ಯಾದೇರ್ನಿಯಂತೋಚ್ಯತೇ । ನ ಹಿ ಹಿರಣ್ಯಗರ್ಭಮಾತ್ರಸ್ಯಾಸ್ಮಿನ್ಪ್ರಕರಣೇ ಪೂರ್ವಾಪರಗ್ರಂಥಯೋರುಚ್ಯಮಾನಂ ನಿರಂಕುಶಂ ಸರ್ವನಿಯಂತೃತ್ವಂ ಸಂಭವತೀತಿ ಭಾವಃ । ಏತೇ ಕಾಲಾವಯವಾ ವಿಧೃತಾಸ್ತಿಷ್ಠಂತೀತಿ ಸಂಬಂಧಃ ।
ತತ್ರಾನುಮಾನಂ ವಕ್ತುಂ ಹೇತುಮಾಹ —
ಸರ್ವಸ್ಯೇತಿ ।
ಯಃ ಕಲಯಿತಾ ಸ ನಿಯಂತೃಪೂರ್ವಕ ಇತಿ ವ್ಯಾಪ್ತಿಭೂಮಿಮಾಹ —
ಯಥೇತಿ ।
ದಾರ್ಷ್ಟಾಂತಿಕಂ ದರ್ಶಯನ್ನನುಮಾನಮಾಹ —
ತಥೇತಿ ।
ನಿಮೇಷಾದಯೋ ನಿಯಂತೃಪೂರ್ವಕಾಃ ಕಲಯಿತೃತ್ವಾತ್ಸಂಪ್ರತಿಪನ್ನವದಿತ್ಯರ್ಥಃ ।
ಕಾಸ್ತಾ ನದ್ಯ ಇತ್ಯಪೇಕ್ಷಾಯಾಮಾಹ —
ಗಂಗಾದ್ಯಾ ಇತಿ ।
ಅನ್ಯಥಾ ಪ್ರವರ್ತಿತುಮುತ್ಸಹಮಾನತ್ವಂ ತತ್ತದ್ದೇವತಾನಾಂ ಚೇತನತ್ವೇನ ಸ್ವಾತಂತ್ರ್ಯಮ್ । ವಿಮತಾ ನಿಯಂತೃಪೂರ್ವಿಕಾ ನಿಯತಪ್ರವೃತ್ತಿತ್ವಾದ್ಧೃತ್ಯಾದಿಪ್ರವೃತ್ತಿವದಿತಿ ಚತುರ್ಥಪರ್ಯಾಯಾರ್ಥಃ । ನಿಯತಪ್ರವೃತ್ತಿಮತ್ತ್ವಂ ತದೇತದಿತ್ಯುಚ್ಯತೇ । ತಚ್ಚೇತ್ಯವ್ಯಭಿಚಾರಿತೋಕ್ತಿಃ ।
ವಿಮತಂ ವಿಶಿಷ್ಟಜ್ಞಾನವದ್ದಾತೃಕಂ ಕರ್ಮಫಲತ್ವಾತ್ಸೇವಾಫಲವದಿತ್ಯಭಿಪ್ರೇತ್ಯ ಪಂಚಮಂ ಪರ್ಯಾಯಮುತ್ಥಾಪಯತಿ —
ಕಿಂ ಚೇತಿ ।
ದಾತಾ ಪ್ರತಿಗ್ರಹೀತಾ ದಾನಂ ದೇಯಂ ವಾ ಫಲಂ ದಾಸ್ಯತಿ ಕಿಮೀಶ್ವರೇಣೇತ್ಯಾಶಂಕ್ಯಾಽಽಹ —
ತತ್ರೇತಿ ।
ದಾತ್ರಾದೀನಾಮಿಹೈವ ಪ್ರತ್ಯಕ್ಷೋ ನಾಶೋ ದೃಶ್ಯತೇ ತೇನ ತತ್ಪ್ರಯುಕ್ತೋ ದೃಷ್ಟಃ । ಪುರುಷಾರ್ಥೋ ನ ಕಶ್ಚಿದಸ್ತೀತ್ಯರ್ಥಃ ।
ಅದೃಷ್ಟಂ ಪುರುಷಾರ್ಥಂ ಪ್ರತ್ಯಾಹ —
ಅದೃಷ್ಟಸ್ತ್ವಿತಿ ।
ಸಮಾಗಮಃ ಫಲಪ್ರತಿಲಾಭಃ ಸ ಖಲ್ವೈಹಿಕೋ ನ ಭವತಿ ಕಿಂತು ಪಾರಲೌಕಿಕಸ್ತಥಾ ಚ ನಾಸಾವಿಹೈವ ನಷ್ಟದಾತ್ರಾದಿಪ್ರಯುಕ್ತಃ ಸಂಭವತೀತ್ಯರ್ಥಃ ।
ತರ್ಹಿ ಫಲದಾತುರಭಾವಾತ್ಸ್ವಾರ್ಥಭ್ರಂಶೋ ಹಿ ಮೂರ್ಖತೇತಿ ನ್ಯಾಯಾದ್ದಾತೃಪ್ರಶಂಸೈವ ಮಾ ಭೂದಿತ್ಯಾಶಂಕ್ಯಾಽಽಹ —
ತಥಾಽಪೀತಿ ।
ಫಲಸಂಯೋಗದೃಷ್ಟೌ ಹೇತುಮಾಹ —
ಪ್ರಮಾಣಜ್ಞತಯೇತಿ ।
‘ಹಿರಣ್ಯದಾ ಅಮೃತತ್ವಂ ಭಜಂತೇ’ ಇತ್ಯಾದಿ ಪ್ರಮಾಣಮ್ ।
ತಥಾಽಪಿ ಕಥಮೀಶ್ವರಸಿದ್ಧಿಸ್ತತ್ರಾಽಽಹ —
ಕರ್ತುರಿತಿ ।
ತದ್ಧಿ ದಾತೃಪ್ರಶಂಸನಂ ವಿಶಿಷ್ಟೇ ನಿಯಂತರ್ಯಸತ್ಯನುಪಪನ್ನಂ ತತ್ಕಲ್ಪಕಮಿತ್ಯರ್ಥಃ ।
ದಾನಕ್ರಿಯಾವಶಾದೇವ ತತ್ಫಲಸಿದ್ಧೌ ಕೃತಂ ನಿಯಂತ್ರೇತಿ ಚೇನ್ನೇತ್ಯಾಹ —
ದಾನೇತಿ ।
ಕರ್ಮಣಃ ಕ್ಷಣಿಕತ್ವಾತ್ಫಲಸ್ಯ ಚ ಕಾಲಾಂತರಭಾವಿತ್ವಾನ್ನ ಸಾಧನತ್ವೋಪಪತ್ತಿರಿತ್ಯರ್ಥಃ ।
ಅನುಮಾನಾರ್ಥಾಪತ್ತಿಭ್ಯಾಂ ಸಿದ್ಧಮರ್ಥಮುಪಸಂಹರತಿ —
ತಸ್ಮಾದಿತಿ ।
ಅಪೂರ್ವಸ್ಯೈವ ಫಲದಾತೃತ್ವಾತ್ಕೃತಮೀಶ್ವರೇಣೇತಿ ಶಂಕತೇ —
ಅಪೂರ್ವಮಿತಿ ಚೇದಿತಿ ।
ಸ್ವಯಮಚೇತನಂ ಚೇತನಾನಧಿಷ್ಠಿತಂ ಚಾಪೂರ್ವಂ ಫಲದಾತೃ ನ ಕಲ್ಪ್ಯಮಪ್ರಾಮಾಣಿಕತ್ವಾದಿತಿ ಪರಿಹರತಿ —
ನೇತಿ ।
ಈಶ್ವರದ್ವೇಷೀ ಶಂಕತೇ —
ಪ್ರಶಾಸ್ತುರಿತಿ ।
ಸದ್ಭಾವೇ ಪ್ರಮಾಣಾನುಪಪತ್ತಿರಿತಿ ಶೇಷಃ ।
ಪರಿಹರತಿ —
ನಾಽಽಗಮೇತಿ ।
ಕಥಂ ಕಾರ್ಯಪರಸ್ಯಾಽಽಗಮಸ್ಯ ವಸ್ತುಪರತ್ವಮಿತ್ಯಾಶಂಕ್ಯಾಽಽಹ —
ಅವೋಚಾಮೇತಿ ।
ಕರ್ಮವಿಧಿರ್ಹಿ ಫಲದಾತ್ರತಿರೇಕೇಣ ನೋಪಪದ್ಯತೇ ನ ಚ ಕರ್ಮಾಽಽಶುತರವಿನಾಶಿ ಕಾಲಾಂತರಭಾವಿಫಲಾನುಕೂಲಂ ತದರ್ಥಾಪತ್ತಿಸಿದ್ಧೇಽಪೂರ್ವೇ ಕಥಂ ಮಾನಾಸಿದ್ಧಿರಿತ್ಯಾಶಂಕ್ಯಾಽಽಹ —
ಕಿಂಚೇತಿ ।
ನ ಕೇವಲಂ ಸದ್ಭಾವೇ ಪ್ರಮಾಣಾಸತ್ತ್ವಮೇವಾಪೂರ್ವೇ ದೂಷಣಂ ಕಿಂತ್ವನ್ಯಚ್ಚ ಕಿಂಚಿದಸ್ತೀತಿ ಯಾವತ್ ।
ತದೇವ ಪ್ರಕಟಯತಿ —
ಅಪೂರ್ವೇತಿ ।
ಅಪೂರ್ವಸ್ಯ ಕಲ್ಪನಾಯಾಂ ಯಾಽರ್ಥಾಪತ್ತಿಃ ಶಂಕ್ಯತೇ ತಸ್ಯಾಃ ಕಲ್ಪಿತಮಪೂರ್ವಮಂತರೇಣಾಪ್ಯುಪಪತ್ತೇಃ ಕ್ಷಯಃ ಸ್ಯಾದಿತಿ ಯೋಜನಾ ।
ಅನ್ಯಥಾಽಪ್ಯುಪಪತ್ತಿಂ ವಿವೃಣೋತಿ —
ಸೇವೇತಿ ।
ಯಾಗಾದಿಫಲಮಪೀಶ್ವರಾತ್ಸಂಭವತೀತಿ ಶೇಷಃ ।
ಕಥಮೀಶ್ವರಾಧೀನಾ ಯಾಗಾದಿಫಲಪ್ರಾಪ್ತಿಸ್ತತ್ರಾಽಽಹ —
ಸೇವಾಯಾಶ್ಚೇತಿ ।
ಆದಿಪದೇನೇಂದ್ರಾದಿದೇವತಾ ಗೃಹ್ಯಂತೇ । ವಿಮತಾ ವಿಶಿಷ್ಟಜ್ಞಾನವತಾ ದೀಯಮಾನಫಲವತೀ ವಿಶಿಷ್ಟಕ್ರಿಯಾತ್ವಾತ್ಸಂಪ್ರತಿಪನ್ನವದಿತಿ ಭಾವಃ ।
ಇತಶ್ಚಾಪೂರ್ವಕಲ್ಪನಾ ನ ಯುಕ್ತೇತ್ಯಾಹ —
ದೃಷ್ಟೇತಿ ।
ದೃಷ್ಟಂ ಸೇವಾಯಾ ಧರ್ಮತ್ವೇನ ಸಾಮರ್ಥ್ಯಂ ಸೇವ್ಯಾತ್ಫಲಪ್ರಾಪಕತ್ವಂ ತದನುಸೃತ್ಯ ದಾನಾದೌ ಫಲಪ್ರಾಪ್ತಿಸಂಭವೇ ತನ್ನಿರಾಸೇನಾಪೂರ್ವಾತ್ತತ್ಕಲ್ಪನಾ ನ ನ್ಯಾಯ್ಯಾ ದೃಷ್ಟಾನುಸಾರಿಣ್ಯಾಂ ಕಲ್ಪನಾಯಾಂ ತದ್ವಿರೋಧಿಕಲ್ಪನಾಯೋಗಾದಿತ್ಯರ್ಥಃ ।
ಅಪೂರ್ವಸ್ಯ ಫಲಹೇತುತ್ವೇ ದೋಷಾಂತರಮಾಹ —
ಕಲ್ಪನೇತಿ ।
ತದಾಧಿಕ್ಯಂ ವಕ್ತುಂ ಪರಾಮೃಶತಿ —
ಈಶ್ವರ ಇತಿ ।
ನಾಪೂರ್ವಂ ಕಲ್ಪ್ಯಂ ಕ್ಲೃಪ್ತತ್ವಾತ್ತನ್ನ ಕಲ್ಪನಾಧಿಕ್ಯಮಿತ್ಯಾಶಂಕ್ಯಾಽಽಹ —
ತತ್ರೇತಿ ।
ವ್ಯವಹಾರಭೂಮಿಃ ಸಪ್ತಮ್ಯರ್ಥಃ ।
ಭೂಮಿಕಾಂ ಕೃತ್ವಾ ಕಲ್ಪನಾಧಿಕ್ಯಂ ಸ್ಫುಟಯತಿ —
ತತ್ರೇತ್ಯಾದಿನಾ ।
ಅಪೂರ್ವಸ್ಯಾದೃಷ್ಟತ್ವೇ ಸತೀತಿ ಯಾವತ್ । ಇತಿ ಕಲ್ಪನಾಧಿಕ್ಯಮಿತಿ ಶೇಷಃ ।
ತ್ವನ್ಮತೇಽಪಿ ತುಲ್ಯಾ ಕಲ್ಪನೇತ್ಯಾಶಂಕ್ಯಾಽಽಹ —
ಇಹ ತ್ವಿತಿ ।
ಸ್ವಪಕ್ಷೇ ಧರ್ಮಿಮಾತ್ರಂ ಕಲ್ಪ್ಯಂ ಪರಪಕ್ಷೇ ಧರ್ಮೀ ಧರ್ಮಶ್ಚೇತ್ಯಾಧಿಕ್ಯಂ ತಸ್ಮಾತ್ಫಲಮತ ಉಪಪತ್ತೇರಿತಿ ನ್ಯಾಯೇನ ಪರಸ್ಯೈವ ಫಲದಾತೃತೇತಿ ಭಾವಃ ।
ಧರ್ಮಿಣೋಽಪಿ ಪ್ರಾಮಾಣಿಕತ್ವಂ ನ ಕಲ್ಪ್ಯತ್ವಮಿತ್ಯಭಿಪ್ರೇತ್ಯಾಽಽಹ —
ಅನುಮಾನಂ ಚೇತಿ ।
ಈಶ್ವರಾಸ್ತಿತ್ವೇ ಹೇತ್ವಂತರಮಾಹ —
ತಥಾ ಚೇತಿ ।
ದೇವಾ ಯಜಮಾನಮನ್ವಾಯತ್ತಾ ಇತಿ ಸಂಬಂಧಃ । ಜೀವನಾರ್ಥೇ ಜೀವನಂ ನಿಮಿತ್ತೀಕೃತ್ಯೇತಿ ಯಾವತ್ । ದೇವಾನಾಮೀಶ್ವರಾಣಾಮಪಿ ಹವ್ಯರ್ಥಿತ್ವೇನ ಮನುಷ್ಯಾಧೀನತ್ವಾಖ್ಯಹೀನವೃತ್ತಿಭಾಕ್ತ್ವಂ ನಿಯಂತೃಕಲ್ಪಕಮಿತ್ಯರ್ಥಃ । ಯೋ ನ ಕಸ್ಯಚಿತ್ಪ್ರಕೃತಿತ್ವೇನ ವಿಕೃತಿತ್ವೇನ ವಾ ವರ್ತತೇ ಸ ದರ್ವೀಹೋಮಃ ॥೯॥