ಅಥ ಹೈನಂ ವಿದಗ್ಧ ಇತಿ ನಾಮತಃ, ಶಕಲಸ್ಯಾಪತ್ಯಂ ಶಾಕಲ್ಯಃ, ಪಪ್ರಚ್ಛ — ಕತಿಸಂಖ್ಯಾಕಾ ದೇವಾಃ ಹೇ ಯಾಜ್ಞವಲ್ಕ್ಯೇತಿ । ಸ ಯಾಜ್ಞವಲ್ಕ್ಯಃ, ಹ ಕಿಲ, ಏತಯೈವ ವಕ್ಷ್ಯಮಾಣಯಾ ನಿವಿದಾ ಪ್ರತಿಪೇದೇ ಸಂಖ್ಯಾಮ್ , ಯಾಂ ಸಂಖ್ಯಾಂ ಪೃಷ್ಟವಾನ್ ಶಾಕಲ್ಯಃ ; ಯಾವಂತಃ ಯಾವತ್ಸಂಖ್ಯಾಕಾ ದೇವಾಃ ವೈಶ್ವದೇವಸ್ಯ ಶಸ್ತ್ರಸ್ಯ ನಿವಿದಿ — ನಿವಿನ್ನಾಮ ದೇವತಾಸಂಖ್ಯಾವಾಚಕಾನಿ ಮಂತ್ರಪದಾನಿ ಕಾನಿಚಿದ್ವೈಶ್ವದೇವೇ ಶಸ್ತ್ರೇ ಶಸ್ಯಂತೇ, ತಾನಿ ನಿವಿತ್ಸಂಜ್ಞಕಾನಿ ; ತಸ್ಯಾಂ ನಿವಿದಿ ಯಾವಂತೋ ದೇವಾಃ ಶ್ರೂಯಂತೇ, ತಾವಂತೋ ದೇವಾ ಇತಿ । ಕಾ ಪುನಃ ಸಾ ನಿವಿದಿತಿ ತಾನಿ ನಿವಿತ್ಪದಾನಿ ಪ್ರದರ್ಶ್ಯಂತೇ — ತ್ರಯಶ್ಚ ತ್ರೀ ಚ ಶತಾತ್ರಯಶ್ಚ ದೇವಾಃ, ದೇವಾನಾಂ ತ್ರೀ ಚ ತ್ರೀಣಿ ಚ ಶತಾನಿ ; ಪುನರಪ್ಯೇವಂ ತ್ರಯಶ್ಚ, ತ್ರೀ ಚ ಸಹಸ್ರಾ ಸಹಸ್ರಾಣಿ — ಏತಾವಂತೋ ದೇವಾ ಇತಿ । ಶಾಕಲ್ಯೋಽಪಿ ಓಮಿತಿ ಹೋವಾಚ । ಏವಮೇಷಾಂ ಮಧ್ಯಮಾ ಸಂಖ್ಯಾ ಸಮ್ಯಕ್ತಯಾ ಜ್ಞಾತಾ ; ಪುನಸ್ತೇಷಾಮೇವ ದೇವಾನಾಂ ಸಂಕೋಚವಿಷಯಾಂ ಸಂಖ್ಯಾಂ ಪೃಚ್ಛತಿ — ಕತ್ಯೇವ ದೇವಾ ಯಾಜ್ಞವಲ್ಕ್ಯೇತಿ ; ತ್ರಯಸ್ತ್ರಿಂಶತ್ , ಷಟ್ , ತ್ರಯಃ, ದ್ವೌ, ಅಧ್ಯರ್ಧಃ, ಏಕಃ — ಇತಿ । ದೇವತಾಸಂಕೋಚವಿಕಾಸವಿಷಯಾಂ ಸಂಖ್ಯಾಂ ಪೃಷ್ಟ್ವಾ ಪುನಃ ಸಂಖ್ಯೇಯಸ್ವರೂಪಂ ಪೃಚ್ಛತಿ — ಕತಮೇ ತೇ ತ್ರಯಶ್ಚ ತ್ರೀ ಚ ಶತಾ ತ್ರಯಶ್ಚ ತ್ರೀ ಚ ಸಹಸ್ರೇತಿ ॥