अद्वैतशारदा | दक्षिणाम्नाय श्रीशारदापीठम्, शृङ्गेरी

ಸ ಹೋವಾಚ ಮಹಿಮಾನ ಏವೈಷಾಮೇತೇ ತ್ರಯಸ್ತ್ರಿಂಶತ್ತ್ವೇವ ದೇವಾ ಇತಿ ಕತಮೇ ತೇ ತ್ರಯಸ್ತ್ರಿಂಶದಿತ್ಯಷ್ಟೌ ವಸವ ಏಕಾದಶ ರುದ್ರಾ ದ್ವಾದಶಾದಿತ್ಯಾಸ್ತ ಏಕತ್ರಿಂಶದಿಂದ್ರಶ್ಚೈವ ಪ್ರಜಾಪತಿಶ್ಚ ತ್ರಯಸ್ತ್ರಿಂಶಾವಿತಿ ॥ ೨ ॥

ಸ ಹೋವಾಚ ಇತರಃ — ಮಹಿಮಾನಃ ವಿಭೂತಯಃ, ಏಷಾಂ ತ್ರಯಸ್ತ್ರಿಂಶತಃ ದೇವಾನಾಮ್ , ಏತೇ ತ್ರಯಶ್ಚ ತ್ರೀ ಚ ಶತೇತ್ಯಾದಯಃ ; ಪರಮಾರ್ಥತಸ್ತು ತ್ರಯಸ್ತ್ರಿಂಶತ್ತ್ವೇವ ದೇವಾ ಇತಿ । ಕತಮೇ ತೇ ತ್ರಯಸ್ತ್ರಿಂಶದಿತ್ಯುಚ್ಯತೇ — ಅಷ್ಟೌ ವಸವಃ, ಏಕಾದಶ ರುದ್ರಾಃ, ದ್ವಾದಶ ಆದಿತ್ಯಾಃ — ತೇ ಏಕತ್ರಿಂಶತ್ — ಇಂದ್ರಶ್ಚೈವ ಪ್ರಜಾಪತಿಶ್ಚ ತ್ರಯಸ್ತ್ರಿಂಶಾವಿತಿ ತ್ರಯಸ್ತ್ರಿಂಶತಃ ಪೂರಣೌ ॥

ಪರಮಾರ್ಥತಸ್ತ್ವಿತಿ ; ಕತಮೇ ತ ಇತಿ ॥೨॥ ;

ಕತಿ ತರ್ಹಿ ದೇವಾ ನಿವಿದಿ ಭವಂತಿ ತತ್ರಾಽಽಹ —

ಪರಮಾರ್ಥತಸ್ತ್ವಿತಿ ।

ತ್ರಯಸ್ತ್ರಿಂಶತೋ ದೇವಾನಾಂ ಸ್ವರೂಪಂ ಪ್ರಶ್ನದ್ವಾರಾ ನಿರ್ಧಾರಯತಿ —

ಕತಮೇ ತ ಇತಿ ॥೨॥