ಯಾಜ್ಞವಲ್ಕ್ಯೇತಿ ಹೋವಾಚ ಶಾಕಲ್ಯಃ — ಯದಿದಂ ಕುರುಪಂಚಾಲಾನಾಂ ಬ್ರಾಹ್ಮಣಾನ್ ಅತ್ಯವಾದೀಃ ಅತ್ಯುಕ್ತವಾನಸಿ — ಸ್ವಯಂ ಭೀತಾಸ್ತ್ವಾಮಂಗಾರಾವಕ್ಷಯಣಂ ಕೃತವಂತ ಇತಿ — ಕಿಂ ಬ್ರಹ್ಮ ವಿದ್ವಾನ್ಸನ್ ಏವಮಧಿಕ್ಷಿಪಸಿ ಬ್ರಾಹ್ಮಣಾನ್ । ಯಾಜ್ಞವಲ್ಕ್ಯ ಆಹ — ಬ್ರಹ್ಮವಿಜ್ಞಾನಂ ತಾವದಿದಂ ಮಮ ; ಕಿಂ ತತ್ ? ದಿಶೋ ವೇದ ದಿಗ್ವಿಷಯಂ ವಿಜ್ಞಾನಂ ಜಾನೇ ; ತಚ್ಚ ನ ಕೇವಲಂ ದಿಶ ಏವ, ಸದೇವಾಃ ದೇವೈಃ ಸಹ ದಿಗಧಿಷ್ಠಾತೃಭಿಃ, ಕಿಂಚ ಸಪ್ರತಿಷ್ಠಾಃ ಪ್ರತಿಷ್ಠಾಭಿಶ್ಚ ಸಹ । ಇತರ ಆಹ — ಯತ್ ಯದಿ ದಿಶೋ ವೇತ್ಥ ಸದೇವಾಃ ಸಪ್ರತಿಷ್ಟಾ ಇತಿ, ಸಫಲಂ ಯದಿ ವಿಜ್ಞಾನಂ ತ್ವಯಾ ಪ್ರತಿಜ್ಞಾತಮ್ ॥