యాజ్ఞవల్క్యేతి హోవాచ శాకల్యః — యదిదం కురుపఞ్చాలానాం బ్రాహ్మణాన్ అత్యవాదీః అత్యుక్తవానసి — స్వయం భీతాస్త్వామఙ్గారావక్షయణం కృతవన్త ఇతి — కిం బ్రహ్మ విద్వాన్సన్ ఎవమధిక్షిపసి బ్రాహ్మణాన్ । యాజ్ఞవల్క్య ఆహ — బ్రహ్మవిజ్ఞానం తావదిదం మమ ; కిం తత్ ? దిశో వేద దిగ్విషయం విజ్ఞానం జానే ; తచ్చ న కేవలం దిశ ఎవ, సదేవాః దేవైః సహ దిగధిష్ఠాతృభిః, కిఞ్చ సప్రతిష్ఠాః ప్రతిష్ఠాభిశ్చ సహ । ఇతర ఆహ — యత్ యది దిశో వేత్థ సదేవాః సప్రతిష్టా ఇతి, సఫలం యది విజ్ఞానం త్వయా ప్రతిజ్ఞాతమ్ ॥