కిన్దేవతోఽస్యాం దక్షిణాయాం దిశ్యసీతి పూర్వవత్ — దక్షిణాయాం దిశి కా దేవతా తవ । యమదేవత ఇతి — యమో దేవతా మమ దక్షిణాదిగ్భూతస్య । స యమః కస్మిన్ప్రతిష్ఠిత ఇతి, యజ్ఞ ఇతి — యజ్ఞే కారణే ప్రతిష్ఠితో యమః సహ దిశా । కథం పునర్యజ్ఞస్య కార్యం యమ ఇత్యుచ్యతే — ఋత్విగ్భిర్నిష్పాదితో యజ్ఞః ; దక్షిణయా యజమానస్తేభ్యో యజ్ఞం నిష్క్రీయ తేన యజ్ఞేన దక్షిణాం దిశం సహ యమేనాభిజాయతి ; తేన యజ్ఞే యమః కార్యత్వాత్ప్రతిష్ఠితః సహ దక్షిణయా దిశా । కస్మిన్ను యజ్ఞః ప్రతిష్ఠిత ఇతి, దక్షిణాయామితి — దక్షిణయా స నిష్క్రీయతే ; తేన దక్షిణాకార్యం యజ్ఞః । కస్మిన్ను దక్షిణా ప్రతిష్ఠితేతి, శ్రద్ధాయామితి — శ్రద్ధా నామ దిత్సుత్వమ్ ఆస్తిక్యబుద్ధిర్భక్తిసహితా । కథం తస్యాం ప్రతిష్ఠితా దక్షిణా ? యస్మాత్ యదా హ్యేవ శ్రద్ధత్తే అథ దక్షిణాం దదాతి, న అశ్రద్దధత్ దక్షిణాం దదాతి ; తస్మాత్ శ్రద్ధాయాం హ్యేవ దక్షిణా ప్రతిష్ఠితేతి । కస్మిన్ను శ్రద్ధా ప్రతిష్ఠితేతి, హృదయ ఇతి హోవాచ — హృదయస్య హి వృత్తిః శ్రద్ధా యస్మాత్ , హృదయేన హి శ్రద్ధాం జానాతి ; వృత్తిశ్చ వృత్తిమతి ప్రతిష్ఠితా భవతి ; తస్మాద్ధృదయే హ్యేవ శ్రద్ధా ప్రతిష్ఠితా భవతీతి । ఎవమేవైతద్యాజ్ఞవల్క్య ॥