ಕಿಂದೇವತೋಽಸ್ಯಾಮುದೀಚ್ಯಾಂ ದಿಶ್ಯಸೀತಿ, ಸೋಮದೇವತ ಇತಿ — ಸೋಮ ಇತಿ ಲತಾಂ ಸೋಮಂ ದೇವತಾಂ ಚೈಕೀಕೃತ್ಯ ನಿರ್ದೇಶಃ । ಸ ಸೋಮಃ ಕಸ್ಮಿನ್ಪ್ರತಿಷ್ಠಿತ ಇತಿ, ದೀಕ್ಷಾಯಾಮಿತಿ — ದೀಕ್ಷಿತೋ ಹಿ ಯಜಮಾನಃ ಸೋಮಂ ಕ್ರೀಣಾತಿ ; ಕ್ರೀತೇನ ಸೋಮೇನ ಇಷ್ಟ್ವಾ ಜ್ಞಾನವಾನುತ್ತರಾಂ ದಿಶಂ ಪ್ರತಿಪದ್ಯತೇ ಸೋಮದೇವತಾಧಿಷ್ಠಿತಾಂ ಸೌಮ್ಯಾಮ್ । ಕಸ್ಮಿನ್ನು ದೀಕ್ಷಾ ಪ್ರತಿಷ್ಠಿತೇತಿ, ಸತ್ಯ ಇತಿ — ಕಥಮ್ ? ಯಸ್ಮಾತ್ಸತ್ಯೇ ದೀಕ್ಷಾ ಪ್ರತಿಷ್ಠಿತಾ, ತಸ್ಮಾದಪಿ ದೀಕ್ಷಿತಮಾಹುಃ — ಸತ್ಯಂ ವದೇತಿ — ಕಾರಣಭ್ರೇಷೇ ಕಾರ್ಯಭ್ರೇಷೋ ಮಾ ಭೂದಿತಿ । ಸತ್ಯೇ ಹ್ಯೇವ ದೀಕ್ಷಾ ಪ್ರತಿಷ್ಠಿತೇತಿ । ಕಸ್ಮಿನ್ನು ಸತ್ಯಂ ಪ್ರತಿಷ್ಠಿತಮಿತಿ ; ಹೃದಯ ಇತಿ ಹೋವಾಚ ; ಹೃದಯೇನ ಹಿ ಸತ್ಯಂ ಜಾನಾತಿ ; ತಸ್ಮಾತ್ ಹೃದಯೇ ಹ್ಯೇವ ಸತ್ಯಂ ಪ್ರತಿಷ್ಠಿತಂ ಭವತೀತಿ । ಏವಮೇವೈತದ್ಯಾಜ್ಞವಲ್ಕ್ಯ ॥