కిన్దేవతోఽస్యాముదీచ్యాం దిశ్యసీతి, సోమదేవత ఇతి — సోమ ఇతి లతాం సోమం దేవతాం చైకీకృత్య నిర్దేశః । స సోమః కస్మిన్ప్రతిష్ఠిత ఇతి, దీక్షాయామితి — దీక్షితో హి యజమానః సోమం క్రీణాతి ; క్రీతేన సోమేన ఇష్ట్వా జ్ఞానవానుత్తరాం దిశం ప్రతిపద్యతే సోమదేవతాధిష్ఠితాం సౌమ్యామ్ । కస్మిన్ను దీక్షా ప్రతిష్ఠితేతి, సత్య ఇతి — కథమ్ ? యస్మాత్సత్యే దీక్షా ప్రతిష్ఠితా, తస్మాదపి దీక్షితమాహుః — సత్యం వదేతి — కారణభ్రేషే కార్యభ్రేషో మా భూదితి । సత్యే హ్యేవ దీక్షా ప్రతిష్ఠితేతి । కస్మిన్ను సత్యం ప్రతిష్ఠితమితి ; హృదయ ఇతి హోవాచ ; హృదయేన హి సత్యం జానాతి ; తస్మాత్ హృదయే హ్యేవ సత్యం ప్రతిష్ఠితం భవతీతి । ఎవమేవైతద్యాజ్ఞవల్క్య ॥