ಅಥ ಹೋವಾಚ । ಅಥ ಅನಂತರಂ ತೂಷ್ಣೀಂಭೂತೇಷು ಬ್ರಾಹ್ಮಣೇಷು ಹ ಉವಾಚ, ಹೇ ಬ್ರಾಹ್ಮಣಾ ಭಗವಂತ ಇತ್ಯೇವಂ ಸಂಬೋಧ್ಯ — ಯೋ ವಃ ಯುಷ್ಮಾಕಂ ಮಧ್ಯೇ ಕಾಮಯತೇ ಇಚ್ಛತಿ — ಯಾಜ್ಞವಲ್ಕ್ಯಂ ಪೃಚ್ಛಾಮೀತಿ, ಸ ಮಾ ಮಾಮ್ ಆಗತ್ಯ ಪೃಚ್ಛತು ; ಸರ್ವೇ ವಾ ಮಾ ಪೃಚ್ಛತ — ಸರ್ವೇ ವಾ ಯೂಯಂ ಮಾ ಮಾಂ ಪೃಚ್ಛತ ; ಯೋ ವಃ ಕಾಮಯತೇ — ಯಾಜ್ಞವಲ್ಕ್ಯೋ ಮಾಂ ಪೃಚ್ಛತ್ವಿತಿ, ತಂ ವಃ ಪೃಚ್ಛಾಮಿ ; ಸರ್ವಾನ್ವಾ ವಃ ಯುಷ್ಮಾನ್ ಅಹಂ ಪೃಚ್ಛಾಮಿ । ತೇ ಹ ಬ್ರಾಹ್ಮಣಾ ನ ದಧೃಷುಃ — ತೇ ಬ್ರಾಹ್ಮಣಾ ಏವಮುಕ್ತಾ ಅಪಿ ನ ಪ್ರಗಲ್ಭಾಃ ಸಂವೃತ್ತಾಃ ಕಿಂಚಿದಪಿ ಪ್ರತ್ಯುತ್ತರಂ ವಕ್ತುಮ್ ॥