ಅಥ ಹೇತ್ಯಾದ್ಯುತ್ತರಗ್ರಂಥಮವತಾರಯತಿ —

ಯಸ್ಯೇತ್ಯಾದಿನಾ ।

ಜಗತೋ ಮೂಲಂ ಚ ವಕ್ತವ್ಯಮಿತ್ಯಾಖ್ಯಾಯಿಕಾಮೇವಾಽಽಶ್ರಿತ್ಯಾಽಽಹೇತಿ ಸಂಬಂಧಃ ।

ಆಖ್ಯಾಯಿಕಾ ಕಿಮರ್ಥೇತ್ಯತ ಆಹ —

ಆಖ್ಯಾಯಿಕೇತಿ ।

ಇತಿಶಬ್ದಃ ಸಂಬಂಧಸಮಾಪ್ತ್ಯರ್ಥಃ ।

ನನು ಬ್ರಾಹ್ಮಣೇಷು ತೂಷ್ಣೀಂಭೂತೇಷು ಪ್ರತಿಷೇದ್ಧುರಭಾವಾದ್ಗೋಧನಂ ಹರ್ತವ್ಯಂ ಕಿಮಿತಿ ತಾನ್ಪ್ರತಿ ಯಾಜ್ಞವಲ್ಕ್ಯೋ ವದತೀತ್ಯತ ಆಹ —

ನ್ಯಾಯಂ ಮತ್ತ್ವೇತಿ ।

ಬ್ರಹ್ಮಸ್ವಂ ಹಿ ಬ್ರಾಹ್ಮಣಾನುಮತಿಮನಾಪಾದ್ಯ ನೀಯಮಾನಮನರ್ಥಾಯ ಸ್ಯಾದಿತಿ ನ್ಯಾಯಃ । ಸಂಬೋಧ್ಯೋವಾಚೇತಿ ಸಂಬಂಧಃ ।