ಏವಂ ಮಾಂಸಾನ್ಯಸ್ಯ ಪುರುಷಸ್ಯ, ವನಸ್ಪತೇಃ ತಾನಿ ಶಕರಾಣಿ ಶಕಲಾನೀತ್ಯರ್ಥಃ । ಕಿನಾಟಮ್ , ವೃಕ್ಷಸ್ಯ ಕಿನಾಟಂ ನಾಮ ಶಕಲೇಭ್ಯೋಽಭ್ಯಂತರಂ ವಲ್ಕಲರೂಪಂ ಕಾಷ್ಠಸಁಲಗ್ನಮ್ , ತತ್ ಸ್ನಾವ ಪುರುಷಸ್ಯ ; ತತ್ಸ್ಥಿರಮ್ — ತಚ್ಚ ಕಿನಾಟಂ ಸ್ನಾವವತ್ ದೃಢಂ ಹಿ ತತ್ ; ಅಸ್ಥೀನಿ ಪುರುಷಸ್ಯ, ಸ್ನಾವ್ನೋಽಂತರತಃ ಅಸ್ಥೀನಿ ಭವಂತಿ ; ತಥಾ ಕಿನಾಟಸ್ಯಾಭ್ಯಂತರತೋ ದಾರೂಣಿ ಕಾಷ್ಠಾನಿ ; ಮಜ್ಜಾ, ಮಜ್ಜೈವ ವನಸ್ಪತೇಃ ಪುರುಷಸ್ಯ ಚ ಮಜ್ಜೋಪಮಾ ಕೃತಾ, ಮಜ್ಜಾಯಾ ಉಪಮಾ ಮಜ್ಜೋಪಮಾ, ನಾನ್ಯೋ ವಿಶೇಷೋಽಸ್ತೀತ್ಯರ್ಥಃ ; ಯಥಾ ವನಸ್ಪತೇರ್ಮಜ್ಜಾ ತಥಾ ಪುರುಷಸ್ಯ, ಯಥಾ ಪುರುಷಸ್ಯ ತಥಾ ವನಸ್ಪತೇಃ ॥