స ఎష హృదయభూతః తైజసః సూక్ష్మభూతేన ప్రాణేన విధ్రియమాణః ప్రాణ ఎవ భవతి ; తస్యాస్య విదుషః క్రమేణ వైశ్వానరాత్ తైజసం ప్రాప్తస్య హృదయాత్మానమాపన్నస్య హృదయాత్మనశ్చ ప్రాణాత్మానమాపన్నస్య ప్రాచీ దిక్ ప్రాఞ్చః ప్రాగ్గతాః ప్రాణాః ; తథా దక్షిణా దిక్ దక్షిణే ప్రాణాః ; తథా ప్రతీచీ దిక్ ప్రత్యఞ్చః ప్రాణాః ; ఉదీచీ దిక్ ఉదఞ్చః ప్రాణాః ; ఊర్ధ్వా దిక్ ఊర్ధ్వాః ప్రాణాః ; అవాచీ దిక్ అవాఞ్చః ప్రాణాః ; సర్వా దిశః సర్వే ప్రాణాః । ఎవం విద్వాన్ క్రమేణ సర్వాత్మకం ప్రాణమాత్మత్వేనోపగతో భవతి ; తం సర్వాత్మానం ప్రత్యగాత్మన్యుపసంహృత్య ద్రష్టుర్హి ద్రష్టృభావం నేతి నేతీత్యాత్మానం తురీయం ప్రతిపద్యతే ; యమ్ ఎష విద్వాన్ అనేన క్రమేణ ప్రతిపద్యతే, స ఎష నేతి నేత్యాత్మేత్యాది న రిష్యతీత్యన్తం వ్యాఖ్యాతమేతత్ । అభయం వై జన్మమరణాదినిమిత్తభయశూన్యమ్ , హే జనక, ప్రాప్తోఽసి — ఇతి హ ఎవం కిల ఉవాచ ఉక్తవాన్ యాజ్ఞవల్క్యః । తదేతదుక్తమ్ — అథ వై తేఽహం తద్వక్ష్యామి యత్ర గమిష్యసీతి । స హోవాచ జనకో వైదేహః — అభయమేవ త్వా త్వామపి గచ్ఛతాత్ గచ్ఛతు, యస్త్వం నః అస్మాన్ హే యాజ్ఞవల్క్య భగవన్ పూజావన్ అభయం బ్రహ్మ వేదయసే జ్ఞాపయసి ప్రాపితవాన్ ఉపాధికృతాజ్ఞానవ్యవధానాపనయనేనేత్యర్థః ; కిమన్యదహం విద్యానిష్క్రయార్థం ప్రయచ్ఛామి, సాక్షాదాత్మానమేవ దత్తవతే ; అతో నమస్తేఽస్తు ; ఇమే విదేహాః తవ యథేష్టం భుజ్యన్తామ్ ; అయం చాహమస్మి దాసభావే స్థితః ; యథేష్టం మాం రాజ్యం చ ప్రతిపద్యస్వేత్యర్థః ॥