ತಾತ್ಪರ್ಯಮೇವಮುಕ್ತ್ವಾ ವ್ಯಾಖ್ಯಾಮಕ್ಷರಾಣಾಮಾರಭತೇ —
ಜನಕಮಿತ್ಯಾದಿನಾ ।
ಸಂವಾದಂ ನ ಕರೋಮೀತಿ ವ್ರತಂ ಚೇತ್ಕಿಮಿತಿ ಗಚ್ಛತೀತ್ಯಾಶಂಕತೇ —
ಗಮನೇತಿ ।
ಉತ್ತರಮಾಹ —
ಯೋಗೇತಿ ।
ಅಥ ಹೇತ್ಯಾದ್ಯವತಾರಯತಿ —
ನೇತ್ಯಾದಿನಾ ।
ಅತ್ರೋತ್ತರತ್ವೇನೇತಿ ಶೇಷಃ । ಪೂರ್ವತ್ರೇತಿ ಕರ್ಮಕಾಂಡೋಕ್ತಿಃ ।
ನನ್ವಗ್ನಿಹೋತ್ರಪ್ರಕರಣೇ ಕಾಮಪ್ರಶ್ನೋ ವರೋ ದತ್ತಶ್ಚೇತ್ಕಿಮಿತಿ ತತ್ರೈವಾಽಽತ್ಮಯಾಥಾತ್ಮ್ಯಪ್ರಶ್ನಪ್ರತಿವಚನೇ ನಾಸೂಚಿಷಾತಾಂ ತತ್ರಾಽಽಹ —
ತತ್ರೈವೇತಿ ।
ಕರ್ಮನಿರಪೇಕ್ಷಾಯಾ ಬ್ರಹ್ಮವಿದ್ಯಾಯಾ ಮೋಕ್ಷಹೇತುತ್ವಾದಪಿ ಕರ್ಮಪ್ರಕರಣೇ ತದನುಕ್ತಿರಿತ್ಯಾಹ —
ವಿದ್ಯಾಯಾಶ್ಚೇತಿ ।
ಸರ್ವಾಪೇಕ್ಷಾಧಿಕರಣನ್ಯಾಯಾನ್ನ ತಸ್ಯಾಃ ಸ್ವಾತಂತ್ರ್ಯಮಿತ್ಯಾಶಂಕ್ಯಾಽಽಹ —
ಸ್ವತಂತ್ರಾ ಹೀತಿ ।
ಸಾ ಹಿ ಸ್ವೋತ್ಪತ್ತೌ ಸ್ವಫಲೇ ವಾ ಕರ್ಮಾಣ್ಯಪೇಕ್ಷತೇ । ನಾಽಽದ್ಯೋಽಭ್ಯುಪಗಮಾತ್ । ನ ದ್ವಿತೀಯಃ । ಅತ ಏವ ಚಾಗ್ನೀಂಧನಾದ್ಯನಪೇಕ್ಷೇತಿ ನ್ಯಾಯಾವಿರೋಧಾದಿತ್ಯಭಿಪ್ರೇಯಾಽಽಹ —
ಸಹಕಾರೀತಿ।
ಇತ್ಯಸ್ಮಾಚ್ಚ ಹೇತೋಸ್ತತ್ರೈವಾನುಕ್ತಿರಿತಿ ಸಂಬಂಧಃ ॥೧॥