ಶಾಂತಾಯಾಂ ಪುನರ್ವಾಚಿ, ಗಂಧಾದಿಷ್ವಪಿ ಚ ಶಾಂತೇಷು ಬಾಹ್ಯೇಷ್ವನುಗ್ರಾಹಕೇಷು, ಸರ್ವಪ್ರವೃತ್ತಿನಿರೋಧಃ ಪ್ರಾಪ್ತೋಽಸ್ಯ ಪುರುಷಸ್ಯ । ಏತದುಕ್ತಂ ಭವತಿ — ಜಾಗ್ರದ್ವಿಷಯೇ ಬಹಿರ್ಮುಖಾನಿ ಕರಣಾನಿ ಚಕ್ಷುರಾದೀನಿ ಆದಿತ್ಯಾದಿಜ್ಯೋತಿರ್ಭಿರನುಗೃಹ್ಯಮಾಣಾನಿ ಯದಾ, ತದಾ ಸ್ಫುಟತರಃ ಸಂವ್ಯವಹಾರೋಽಸ್ಯ ಪುರುಷಸ್ಯ ಭವತೀತಿ ; ಏವಂ ತಾವತ್ ಜಾಗರಿತೇ ಸ್ವಾವಯವಸಂಘಾತವ್ಯತಿರಿಕ್ತೇನೈವ ಜ್ಯೋತಿಷಾ ಜ್ಯೋತಿಷ್ಕಾರ್ಯಸಿದ್ಧಿರಸ್ಯ ಪುರುಷಸ್ಯ ದೃಷ್ಟಾ ; ತಸ್ಮಾತ್ ತೇ ವಯಂ ಮನ್ಯಾಮಹೇ — ಸರ್ವಬಾಹ್ಯಜ್ಯೋತಿಃಪ್ರತ್ಯಸ್ತಮಯೇಽಪಿ ಸ್ವಪ್ನಸುಷುಪ್ತಕಾಲೇ ಜಾಗರಿತೇ ಚ ತಾದೃಗವಸ್ಥಾಯಾಂ ಸ್ವಾವಯವಸಂಘಾತವ್ಯತಿರಿಕ್ತೇನೈವ ಜ್ಯೋತಿಷಾ ಜ್ಯೋತಿಷ್ಕಾರ್ಯಸಿದ್ಧಿರಸ್ಯೇತಿ ; ದೃಶ್ಯತೇ ಚ ಸ್ವಪ್ನೇ ಜ್ಯೋತಿಷ್ಕಾರ್ಯಸಿದ್ಧಿಃ — ಬಂಧುಸಂಗಮನವಿಯೋಗದರ್ಶನಂ ದೇಶಾಂತರಗಮನಾದಿ ಚ ; ಸುಷುಪ್ತಾಚ್ಚ ಉತ್ಥಾನಮ್ — ಸುಖಮಹಮಸ್ವಾಪ್ಸಂ ನ ಕಿಂಚಿದವೇದಿಷಮಿತಿ ; ತಸ್ಮಾದಸ್ತಿ ವ್ಯತಿರಿಕ್ತಂ ಕಿಮಪಿ ಜ್ಯೋತಿಃ ; ಕಿಂ ಪುನಸ್ತತ್ ಶಾಂತಾಯಾಂ ವಾಚಿ ಜ್ಯೋತಿಃ ಭವತೀತಿ । ಉಚ್ಯತೇ — ಆತ್ಮೈವಾಸ್ಯ ಜ್ಯೋತಿರ್ಭವತೀತಿ । ಆತ್ಮೇತಿ ಕಾರ್ಯಕರಣಸ್ವಾವಯವಸಂಘಾತವ್ಯತಿರಿಕ್ತಂ ಕಾರ್ಯಕರಣಾವಭಾಸಕಮ್ ಆದಿತ್ಯಾದಿಬಾಹ್ಯಜ್ಯೋತಿರ್ವತ್ ಸ್ವಯಮನ್ಯೇನಾನವಭಾಸ್ಯಮಾನಮ್ ಅಭಿಧೀಯತೇ ಜ್ಯೋತಿಃ ; ಅಂತಃಸ್ಥಂ ಚ ತತ್ ಪಾರಿಶೇಷ್ಯಾತ್ — ಕಾರ್ಯಕರಣವ್ಯತಿರಿಕ್ತಂ ತದಿತಿ ತಾವತ್ಸಿದ್ಧಮ್ ; ಯಚ್ಚ ಕಾರ್ಯಕರಣವ್ಯತಿರಿಕ್ತಂ ಕಾರ್ಯಕರಣಸಂಘಾತಾನುಗ್ರಾಹಕಂ ಚ ಜ್ಯೋತಿಃ ತತ್ ಬಾಹ್ಯೈಶ್ಚಕ್ಷುರಾದಿಕರಣೈರುಪಲಭ್ಯಮಾನಂ ದೃಷ್ಟಮ್ ; ನ ತು ತಥಾ ತತ್ ಚಕ್ಷುರಾದಿಭಿರುಪಲಭ್ಯತೇ, ಆದಿತ್ಯಾದಿಜ್ಯೋತಿಷ್ಷು ಉಪರತೇಷು ; ಕಾರ್ಯಂ ತು ಜ್ಯೋತಿಷೋ ದೃಶ್ಯತೇ ಯಸ್ಮಾತ್ , ತಸ್ಮಾತ್ ಆತ್ಮನೈವಾಯಂ ಜ್ಯೋತಿಷಾ ಆಸ್ತೇ ಪಲ್ಯಯತೇ ಕರ್ಮ ಕುರುತೇ ವಿಪಲ್ಯೇತೀತಿ ; ತಸ್ಮಾತ್ ನೂನಮ್ ಅಂತಃಸ್ಥಂ ಜ್ಯೋತಿರಿತ್ಯವಗಮ್ಯತೇ । ಕಿಂಚ ಆದಿತ್ಯಾದಿಜ್ಯೋತಿರ್ವಿಲಕ್ಷಣಂ ತತ್ ಅಭೌತಿಕಂ ಚ ; ಸ ಏವ ಹೇತುಃ ಯತ್ ಚಕ್ಷುರಾದ್ಯಗ್ರಾಹ್ಯತ್ವಮ್ , ಆದಿತ್ಯಾದಿವತ್ ॥