ನನ್ವಾತ್ಮಜ್ಯೋತಿಃ ಸಂಘಾತಾದ್ವ್ಯತಿರಿಕ್ತಮಂತಃಸ್ಥಂ ಚೇತಿ ಸಾಧಿತಂ ತಥಾ ಚ ಕಥಂ ಕತಮ ಆತ್ಮೇತಿ ಪೃಚ್ಛ್ಯತೇ ತತ್ರಾಽಽಹ —
ಯದ್ಯಪೀತಿ ।
ಅನುಗ್ರಾಹ್ಯೇಣ ದೇಹಾದಿನಾ ಸಮಾನಜಾತೀಯಸ್ಯಾಽಽದಿತ್ಯಾದೇರನುಗ್ರಾಹಕತ್ವದರ್ಶನಾನ್ನಿಮಿತ್ತಾದನುಗ್ರಾಹಕತ್ವಾವಿಶೇಷಾದಾತ್ಮಜ್ಯೋತಿರಪಿ ಸಮಾನಜಾತೀಯಂ ದೇಹಾದಿನೇತಿ ಭ್ರಾಂತಿರ್ಭವತಿ ತಯೇತಿ ಯಾವತ್ । ಅವಿವೇಕಿನೋ ನಿಷ್ಕೃಷ್ಟದೃಷ್ಟ್ಯಭಾವಾದಿತ್ಯರ್ಥಃ ।
ವ್ಯತಿರೇಕಸಾಧಕಸ್ಯ ನ್ಯಾಯಸ್ಯ ದರ್ಶಿತತ್ವಾತ್ಕುತೋ ಭ್ರಾಂತಿರಿತ್ಯಾಶಂಕ್ಯಾಽಽಹ —
ನ್ಯಾಯೇತಿ ।
ಭಾಂತಿನಿಮಿತ್ತಾವಿವೇಕಕೃತಂ ಪ್ರಶ್ನಮುಕ್ತ್ವಾ ಪ್ರಕಾರಾಂತರೇಣ ಪ್ರಶ್ನಮುತ್ಥಾಪಯತಿ —
ಅಥವೇತಿ ।
ಪ್ರಶ್ನಾಕ್ಷರಾಣಿ ವ್ಯಾಚಷ್ಟೇ —
ಕತಮೋಽಸಾವಿತಿ ।
ನನು ಜ್ಯೋತಿರ್ನಿಮಿತ್ತೋ ವ್ಯವಹಾರೋ ಮಯೋಕ್ತೋ ನ ತ್ವಾತ್ಮೇತ್ಯಾಶಂಕ್ಯಾಽಽಹ —
ಯೇನೇತಿ ।
ಆತ್ಮನೈವಾಯಂ ಜ್ಯೋತಿಷೇತ್ಯುಕ್ತತ್ವಾದಾಸನಾದಿನಿಮಿತ್ತಂ ಜ್ಯೋತಿರಾತ್ಮೇತ್ಯರ್ಥಃ ।
ಪ್ರಕಾರಾಂತರೇಣ ಪ್ರಶ್ನಂ ವ್ಯಾಕರೋತಿ —
ಅಥವೇತಿ ।
ಸಪ್ತಮ್ಯರ್ಥಂ ಕಥಯತಿ —
ಸರ್ವ ಇತಿ ।
ಯೋಽಯಂ ತ್ವಯಾಽಭಿಪ್ರೇತೋ ವಿಜ್ಞಾನಮಯಃ ಸ ಪ್ರಾಣೇಷು ಮಧ್ಯೇ ಕತಮಃ ಸ್ಯಾತ್ತೇಽಪಿ ಹಿ ವಿಜ್ಞಾನಮಯಾ ಇವ ಭಾಂತೀತಿ ಯೋಜನಾ ।
ಉಕ್ತಮರ್ಥಂ ದೃಷ್ಟಾಂತೇನ ಬುದ್ಧಾವಾರೋಪಯತಿ —
ಯಥೇತಿ ।
ವ್ಯಾಖ್ಯಾನಯೋರವಾಂತರವಿಭಾಗಮಾಹ —
ಪೂರ್ವಸ್ಮಿನ್ನಿತ್ಯಾದಿನಾ ।
ಹೃದೀತ್ಯಾದಿ ಪ್ರತಿವಚನಮಿತಿ ಶೇಷಃ ।
ಪಕ್ಷಾಂತರಮಾಹ —
ಅಥವೇತಿ ।
ಸರ್ವಸ್ಯ ಪ್ರಶ್ನತ್ವೇ ವಾಕ್ಯಂ ಯೋಜಯತಿ —
ವಿಜ್ಞಾನೇತಿ ।
ಸ ಸಮಾನಃ ಸನ್ನಿತ್ಯಾದಿನಾ ಪ್ರತಿವಚನಮಿತಿ ಶೇಷಃ ।