నన్వాత్మజ్యోతిః సంఘాతాద్వ్యతిరిక్తమన్తఃస్థం చేతి సాధితం తథా చ కథం కతమ ఆత్మేతి పృచ్ఛ్యతే తత్రాఽఽహ —
యద్యపీతి ।
అనుగ్రాహ్యేణ దేహాదినా సమానజాతీయస్యాఽఽదిత్యాదేరనుగ్రాహకత్వదర్శనాన్నిమిత్తాదనుగ్రాహకత్వావిశేషాదాత్మజ్యోతిరపి సమానజాతీయం దేహాదినేతి భ్రాన్తిర్భవతి తయేతి యావత్ । అవివేకినో నిష్కృష్టదృష్ట్యభావాదిత్యర్థః ।
వ్యతిరేకసాధకస్య న్యాయస్య దర్శితత్వాత్కుతో భ్రాన్తిరిత్యాశఙ్క్యాఽఽహ —
న్యాయేతి ।
భాన్తినిమిత్తావివేకకృతం ప్రశ్నముక్త్వా ప్రకారాన్తరేణ ప్రశ్నముత్థాపయతి —
అథవేతి ।
ప్రశ్నాక్షరాణి వ్యాచష్టే —
కతమోఽసావితి ।
నను జ్యోతిర్నిమిత్తో వ్యవహారో మయోక్తో న త్వాత్మేత్యాశఙ్క్యాఽఽహ —
యేనేతి ।
ఆత్మనైవాయం జ్యోతిషేత్యుక్తత్వాదాసనాదినిమిత్తం జ్యోతిరాత్మేత్యర్థః ।
ప్రకారాన్తరేణ ప్రశ్నం వ్యాకరోతి —
అథవేతి ।
సప్తమ్యర్థం కథయతి —
సర్వ ఇతి ।
యోఽయం త్వయాఽభిప్రేతో విజ్ఞానమయః స ప్రాణేషు మధ్యే కతమః స్యాత్తేఽపి హి విజ్ఞానమయా ఇవ భాన్తీతి యోజనా ।
ఉక్తమర్థం దృష్టాన్తేన బుద్ధావారోపయతి —
యథేతి ।
వ్యాఖ్యానయోరవాన్తరవిభాగమాహ —
పూర్వస్మిన్నిత్యాదినా ।
హృదీత్యాది ప్రతివచనమితి శేషః ।
పక్షాన్తరమాహ —
అథవేతి ।
సర్వస్య ప్రశ్నత్వే వాక్యం యోజయతి —
విజ్ఞానేతి ।
స సమానః సన్నిత్యాదినా ప్రతివచనమితి శేషః ।