ಪಕ್ಷತ್ರಯೇಽಪಿ ದೋಷಂ ಸಂಭಾವಯತಿ —
ಸರ್ವಾ ಇತಿ ।
ಕಥಮಮೂಷಾಂ ಕಲ್ಪನಾನಾಂ ದೂಷಣಮಿತ್ಯಾಶಂಕ್ಯ ಪ್ರಥಮಂ ಬಾಹ್ಯಾರ್ಥವಾದಿನಂ ಪ್ರತ್ಯಾಹ —
ತತ್ರೇತಿ ।
ನಿರ್ಧಾರಣೇ ಸಪ್ತಮೀ ।
ಯತ್ತು ಧೀರೇವಾವಭಾಸಕತ್ವೇನ ಸ್ವಾಕಾರೇತಿ ತತ್ರಾಽಽಹ —
ನೇತಿ ।
ಯದವಭಾಸ್ಯಂ ತತ್ಸ್ವಾತಿರಿಕ್ತಾವಭಾಸ್ಯಮವಭಾಸ್ಯತ್ವಾದ್ಯಥಾ ಘಟಾದಿ । ಅವಭಾಸ್ಯಾ ಚೇಯಂ ಬುದ್ಧಿರಿತ್ಯನುಮಾನಾದ್ಬುದ್ಧಿವ್ಯತಿರಿಕ್ತಃ ಸಾಕ್ಷೀ ಸಿಧ್ಯತೀತ್ಯರ್ಥಃ ।
ದೃಷ್ಟಾಂತಂ ಸಾಧಯತಿ —
ತಮಸೀತಿ।
ತಸ್ಯಾವಭಾಸಕಾಪೇಕ್ಷಾಂ ದರ್ಶಯಿತುಂ ವಿಶೇಷಣಮ್ —
ಸಾಲೋಕೋ ಘಟ ಇತಿ ।
ಸಂಶ್ಲೇಷಾವಗಮಾನ್ನಾಸ್ತಿ ಘಟಸ್ಯ ವ್ಯತಿರಿಕ್ತಾವಭಾಸ್ಯತ್ವಮಿತ್ಯಾಶಂಕ್ಯಾಽಽಹ —
ಸಂಶ್ಲಿಷ್ಟಯೋರಪೀತಿ ।
ಭವತ್ವನ್ಯತ್ವಂ ಕಿಂ ತಾವತೇತ್ಯಾಶಂಕ್ಯಾಽಽಹ —
ಅನ್ಯತ್ವೇ ಚೇತಿ ।
ವ್ಯತಿರಿಕ್ತಾವಭಾಸಕತ್ವಂ ತಾದೃಶಾವಭಾಸಕಸಾಹಿತ್ಯಮಿತಿ ಯಾವತ್ । ಅವಭಾಸಯತಿ ಘಟಾದಿರಿತಿ ಶೇಷಃ ।
ದೃಷ್ಟಾಂತಸ್ಯ ಸಾಧ್ಯವಿಕಲತ್ವೇ ಪರಿಹೃತೇ ವ್ಯಭಿಚಾರಮಾಶಂಕತೇ —
ನನ್ವಿತಿ ।
ತದೇವ ವ್ಯತಿರೇಕಮುಖೇನಾಽಽಹ —
ನ ಹೀತಿ ।
ಅನೈಕಾಂತಿಕತ್ವಂ ನಿಗಮಯತಿ —
ತಸ್ಮಾದಿತಿ ।
ಪ್ರದೀಪಸ್ಯ ಪಕ್ಷತುಲ್ಯತ್ವಾನ್ನ ವ್ಯಭಿಚಾರೋಽಸ್ತೀತಿ ಪರಿಹರತಿ —
ನಾವಭಾಸ್ಯತ್ವೇತಿ ।
ಅಥಾನ್ಯಾವಭಾಸಕತ್ವಾತ್ತಸ್ಯ ನಾನ್ಯಾವಭಾಸ್ಯತ್ವಮಿತಿ ಚೇತ್ತತ್ರಾಽಽಹ —
ಯದ್ಯಪೀತಿ ।
ಅವಭಾಸ್ಯತ್ವಹೇತೋರವ್ಯಭಿಚಾರೇ ಫಲಿತಮಾಹ —
ಯದಾ ಚೇತಿ।
ವ್ಯತಿರಿಕ್ತಾವಭಾಸ್ಯತ್ವಂ ಬುದ್ಧೇರಿತಿ ಶೇಷಃ ।
ಅವಭಾಸ್ಯತ್ವೇ ಸತ್ಯಪಿ ಪ್ರದೀಪೇ ಸ್ವಾತಿರಿಕ್ತೇನೈವಾವಭಾಸ್ಯತ್ವಮಿತಿ ನಿಯಮಾಸಿದ್ಧೇರ್ವ್ಯಭಿಚಾರತಾದವಸ್ಥ್ಯಮಿತಿ ಶಂಕತೇ —
ನನ್ವಿತಿ ।
ಯದಿ ಪ್ರದೀಪಸ್ಯ ಸ್ವಾಭಾಸನಾತ್ಪೂರ್ವಮಸನ್ವಿಶೇಷಃ ಸಮನಂತರಕಾಲೇ ಸ್ಯಾತ್ತದಾ ಸ್ವಾತ್ಮಾನಂ ಭಾಸಯತೀತಿ ವಕ್ತುಂ ಯುಕ್ತಂ ನ ಚ ಸೋಽಸ್ತೀತಿ ದೂಷಯತಿ —
ನೇತ್ಯಾದಿನಾ ।
ತದೇವ ವಿವೃಣೋತಿ —
ಯಥೇತಿ ।
ಅವಭಾಸ್ಯತ್ವಾವಿಶೇಷಾದಿತ್ಯರ್ಥಃ ।
ಪ್ರದೀಪೇ ಪರೋಕ್ತಂ ವಿಶೇಷಮನುಭಾಷ್ಯ ದೂಷಯತಿ —
ಯಸ್ತ್ವಿತ್ಯಾದಿನಾ।
ಯದಾ ದೀಪೋ ನ ಸ್ವಾತ್ಮಾನಂ ಭಾಸಯತಿ ತದಾಽನವಭಾಸಮಾನಃ ಸ್ಯಾದಿತ್ಯಾಶಂಕ್ಯಾಽಽಹ —
ನ ಹೀತಿ।
ವಿಶೇಷಾಭಾವೇಽಪಿ ದೀಪಸ್ಯ ಸ್ವೇನೈವಾವಭಾಸ್ಯತ್ವಂ ಕಿಂ ನ ಸ್ಯಾದಿತಿ ಚೇತ್ತತ್ರಾಽಽಹ —
ಸ ಹೀತಿ ।
ದೀಪಸ್ಯ ವಿಶೇಷಾಂತರಾಭಾವೇಽಪಿ ಸ್ವಾತ್ಮಸಂನಿಧ್ಯಸಂನಿಧೀ ವಿಶೇಷಾವಿತ್ಯಾಶಂಕ್ಯಾಽಽಹ —
ನ ಹೀತಿ ।
ದೀಪಸ್ಯ ಸ್ವೇನಾನ್ಯೇನ ವಾ ಸ್ವಸ್ಮಿನ್ವಿಶೇಷಾಭಾವೇ ಫಲಿತಮಾಹ —
ಅಸತೀತಿ।
ವ್ಯಭಿಚಾರನಿರಾಸಪೂರ್ವಕಂ ಭಾಸ್ಯತ್ವಾನುಮಾನಮುಪಪಾದ್ಯಾನುಮಾನಾಂತರಮಾಹ —
ಚೈತನ್ಯೇತಿ ।
ಯದ್ವ್ಯಂಜಕಂ ತತ್ಸ್ವವಿಜಾತೀಯವ್ಯಂಗ್ಯಂ ಯಥಾ ಸೂರ್ಯಾದಿ ವ್ಯಂಜಕಂ ಚ ವಿಜ್ಞಾನಂ ತಸ್ಮಾದ್ವಿಜ್ಞಾನವ್ಯತಿರಿಕ್ತಶ್ಚಿದಾತ್ಮಾ ಸಿಧ್ಯತೀತ್ಯರ್ಥಃ ।
ಪ್ರದೀಪಸ್ಯ ನ ಸ್ವಾವಭಾಸ್ಯತ್ವಂ ಕಿಂತು ವಿಜಾತೀಯಚೈತನ್ಯಾವಭಾಸ್ಯತ್ವಮಿತಿ ಸ್ಥಿತೇ ಫಲಿತಮಾಹ —
ತಸ್ಮಾದಿತಿ ।
ಯದ್ಗ್ರಾಹ್ಯಂ ತದ್ಗ್ರಾಹಕಾಂತರಗ್ರಾಹ್ಯಂ ಯಥಾ ದೀಪೋ ಗ್ರಾಹ್ಯಂ ಚೇದಂ ವಿಜ್ಞಾನಮಿತ್ಯನುಮಾನಾಂತರಮಾಹ —
ಚೈತನ್ಯೇತಿ ।
ತಥಾಽಪಿ ಕಥಂ ತ್ವದಿಷ್ಟಗ್ರಾಹಕಸಿದ್ಧಿರಿತ್ಯಾಶಂಕ್ಯ ವಿಮೃಶತಿ —
ಚೈತನ್ಯಗ್ರಾಹ್ಯತ್ವೇ ಚೇತಿ ।
ಕಥಂ ತರ್ಹಿ ನಿರ್ಣಯಸ್ತತ್ರಾಽಽಹ —
ಇತಿ ತತ್ರ ಸಂದಿಹ್ಯಮಾನ ಇತಿ ।
ಅಸ್ತು ಲೋಕಾನುಸಾರೀ ನಿಶ್ಚಯೋ ಲೋಕಸ್ತು ಕಥಮಿತ್ಯಾಶಂಕ್ಯಾಽಽಹ —
ತಥಾ ಚೇತಿ ।
ತಥಾಽಪಿ ಕುತೋ ವಿವಕ್ಷಿತಾತ್ಮಜ್ಯೋತಿಸ್ತತ್ರಾಽಽಹ —
ಯಶ್ಚೇತಿ ।
ವಿಜ್ಞಾನಸ್ಯ ಗ್ರಾಹಕಾಂತರಗ್ರಾಹ್ಯತ್ವೇ ತಸ್ಯಾಪಿ ಗ್ರಾಹಕಾಂತರಾಪೇಕ್ಷಾಯಾಮನವಸ್ಥಾಪ್ರಸಕ್ತಿರಿತಿ ಶಂಕತೇ —
ತದಾಽನವಸ್ಥೇತಿ ಚೇದಿತಿ ।
ಕೂಟಸ್ಥಬೋಧಸ್ಯ ವಿಜ್ಞಾನಸಾಕ್ಷಿಣೋಽವಿಷಯತ್ವಾನ್ನಾನವಸ್ಥೇತಿ ಪರಿಹರತಿ —
ನೇತಿ ।
ಯದ್ಗ್ರಾಹ್ಯಂ ತತ್ಸ್ವಾತಿರಿಕ್ತಗ್ರಾಹ್ಯಂ ಯಥಾ ಘಟಾದೀತಿ ಗ್ರಾಹ್ಯತ್ವಮಾತ್ರಂ ಬುದ್ಧಿಗ್ರಾಹಕಸ್ಯ ತತೋ ವಸ್ತ್ವಂತರತ್ವೇ ಪ್ರದೀಪಸ್ಯ ಸ್ವಾನವಭಾಸಸ್ಯತ್ವನ್ಯಾಯೇನ ಲಿಂಗಮುಕ್ತಂ ನ ಚ ಬುದ್ಧಿಸಾಕ್ಷಿಣೋ ಗ್ರಾಹ್ಯತ್ವಮಸ್ತಿ ಕೂಟಸ್ಥದೃಷ್ಟಿಸ್ವಾಭಾವ್ಯಾತ್ತತ್ಕುತೋಽನವಸ್ಥೇತ್ಯುಪಪಾದಯತಿ —
ಗ್ರಾಹ್ಯತ್ವಮಾತ್ರಂ ಹೀತಿ ।
ಸಾಕ್ಷೀ ಸ್ವಾತಿರಿಕ್ತಗ್ರಾಹ್ಯೋ ಗ್ರಾಹಕತ್ವಾದ್ಬುದ್ಧಿವದಿತ್ಯಾಶಂಕ್ಯಾಽಽಹ —
ನ ತ್ವಿತಿ ।
ಗ್ರಾಹಕತ್ವಂ ಹಿ ಗ್ರಹಣಕರ್ತೃತ್ವಂ ವಾ ತತ್ಸಾಕ್ಷಿತ್ವಂ ವಾ । ಆದ್ಯೇ ಬುದ್ಧಿಸಾಕ್ಷಿಣೋ ಮುಖ್ಯವೃತ್ತ್ಯಾ ಗ್ರಹಣಕರ್ತೃತ್ವೇ ನ ಕಿಂಚಿಲ್ಲಿಂಗಂ ಸಂಭವತಿ । ದ್ವಿತೀಯೇ ತಸ್ಯ ಗ್ರಾಹಕಾಂತರಾಸ್ತಿತ್ವೇ ನ ಕದಾಚಿದಪಿ ಪ್ರಮಾಣಮಸ್ತಿ ತತ್ಕುತೋಽನವಸ್ಥೇತ್ಯರ್ಥಃ ।
ಗ್ರಾಹಕಾನವಸ್ಥಾಂ ಪರಿಹೃತ್ಯ ಕರಣಾನವಸ್ಥಾಮಾಶಂಕತೇ —
ವಿಜ್ಞಾನಸ್ಯೇತಿ ।
ತಸ್ಯ ಹಿ ಗ್ರಾಹ್ಯತ್ವೇ ಚಕ್ಷುರಾದಿಸ್ಥಾನೀಯೇನ ಕರಣೇನ ಭವಿತವ್ಯಂ ತಸ್ಯಾಪಿ ಗ್ರಾಹ್ಯತ್ವೇಽನ್ಯತ್ಕರಣಮಿತ್ಯನವಸ್ಥಾಂ ದೂಷಯತಿ —
ನ ನಿಯಮಾಭಾವಾದಿತಿ ।
ನಿಯಮಾಭಾವಂ ಸಾಧಯತಿ —
ನ ಹೀತ್ಯಾದಿನಾ ।
ವೈಚಿತ್ರ್ಯದರ್ಶನಮಾಕಾಂಕ್ಷಾಪೂರ್ವಕಂ ಸ್ಫುಟಯತಿ —
ಕಥಮಿತ್ಯಾದಿನಾ ।
ಉಭಯವ್ಯತಿರೇಕಂ ವಿಶದಯತಿ —
ನ ಹೀತಿ ।
ತಥಾಽಪಿ ಕಥಂ ವೈಚಿತ್ರ್ಯಂ ತತ್ರಾಽಽಹ —
ಘಟವದಿತಿ ।
ನಿಯಮಾಭಾವಮುಪಸಂಹರತಿ —
ತಸ್ಮಾದಿತಿ।
ಅನವಸ್ಥಾದ್ವಯನಿರಾಕರಣಂ ನಿಗಮಯತಿ —
ತಸ್ಮಾದ್ವಿಜ್ಞಾನಸ್ಯೇತಿ ।
ಬಾಹ್ಯಾರ್ಥವಾದಿಮತನಿರಾಕರಣಮುಪಸಂಹರತಿ —
ತಸ್ಮಾತ್ಸಿದ್ಧಮಿತಿ।
ಬಾಹ್ಯಾರ್ಥವಾದಿನೀ ಧ್ವಸ್ತೇ ವಿಜ್ಞಾನವಾದೀ ಚೋದಯತಿ —
ನನ್ವಿತಿ ।
ಬಾಹ್ಯಾರ್ಥೋ ವಿಜ್ಞಾನಾತಿರಿಕ್ತೋ ನಾಸ್ತೀತ್ಯತ್ರ ಪ್ರಮಾಣಮಾಹ —
ಯದ್ಧೀತಿ ।
ನೋಪಲಭ್ಯತೇ ಚ ಜಾಗ್ರದ್ವಸ್ತು ಜಾಗ್ರದ್ವಿಜ್ಞಾನವ್ಯತಿರೇಕೇಣೇತಿ ಶೇಷಃ ।
ದೃಷ್ಟಾಂತಂ ಸಮರ್ಥಯತೇ —
ಸ್ವಪ್ನೇತಿ ।
ದಾರ್ಷ್ಟಾಂತಿಕಂ ವಿವೃಣೋತಿ —
ತಥೇತಿ ।
ಉಕ್ತಮನುಮಾನಮುಪಸಂಹರತಿ —
ತಸ್ಮಾದಿತಿ ।
ಸರ್ವಂ ವಿಜ್ಞಾನಮಾತ್ರಮಿತಿ ಸ್ಥಿತೇ ಫಲಿತಮಾಹ —
ತತ್ರೇತಿ ।
ಕಿಮಿತಿ ತಸ್ಯ ಮಿಥ್ಯಾತ್ವಂ ತತ್ರಾಽಽಹ —
ಸರ್ವಸ್ಯೇತಿ ।
ಬಾಹ್ಯಾರ್ಥಾಪಲಾಪವಾದಿನಂ ದೂಷಯತಿ —
ನೇತ್ಯದಿನಾ ।
ಹೇತುಂ ವಿಶದಯತಿ —
ನನ್ವಿತಿ।
ವಿಜ್ಞಾನಮಾತ್ರವಾದಿತ್ವಾದೇಕಾಂತೇನ ಬಾಹ್ಯಾರ್ಥಾನಭ್ಯುಪಗತಿರಿತಿ ಶಂಕತೇ —
ನನ್ವಿತಿ ।
ಬಾಹ್ಯಾರ್ಥಂ ಹಠಾದಂಗೀಕಾರಯತಿ —
ನೇತ್ಯಾದಿನಾ ।
ಅನ್ವಯಮುಖೇನೋಕ್ತಮರ್ಥಂ ವ್ಯತಿರೇಕಮುಖೇನ ವಿಶದಯತಿ —
ವಿಜ್ಞಾನಾದಿತಿ ।
ಜ್ಞಾನಜ್ಞೇಯಯೋರೈಕ್ಯೇ ದೋಷಾಂತರಮಾಹ —
ತಥೇತಿ ।
ಅನರ್ಥಕಂ ಶಾಸ್ತ್ರಮುಪದಿಶತೋ ಬುದ್ಧಸ್ಯ ಸರ್ವಜ್ಞತ್ವಂ ನ ಸ್ಯಾದಿತ್ಯಾಹ —
ತತ್ಕರ್ತುರಿತಿ ।
ವಾಶಬ್ದಶ್ಚಾರ್ಥಃ ।
ಇತಶ್ಚ ಸರ್ವಸ್ಯ ನಾಸ್ತಿ ವಿಜ್ಞಾನಮಾತ್ರತ್ವಮಿತ್ಯಾಹ —
ಕಿಂಚಾನ್ಯದಿತಿ ।
ನ ಕೇವಲಂ ಪೂರ್ವೋಕ್ತೋಪಪತ್ತಿವಶಾದೇವ ಬಾಹ್ಯಾರ್ಥೋಽಭ್ಯುಪೇಯಃ ಕಿಂತು ತತ್ರೈವಾನ್ಯದಪಿ ಕಾರಣಮುಚ್ಯತ ಇತಿ ಯಾವತ್ ।
ತದೇವ ಸ್ಫುಟಯತಿ —
ವಿಜ್ಞಾನೇತಿ ।
ಯದ್ಗ್ರಾಹ್ಯಂ ತತ್ಸ್ವವ್ಯತಿರಿಕ್ತಗ್ರಾಹ್ಯಂ ಯಥಾ ಪ್ರತಿವಾದ್ಯಾದಿ ಜಾಗ್ರದ್ವಸ್ತು ಚೇದಂ ಗ್ರಾಹ್ಯಮಿತ್ಯನುಮಾನಾನ್ನ ಬಾಹ್ಯಾರ್ಥಾಪಲಾಪಸಿದ್ಧಿರಿತ್ಯರ್ಥಃ ।
ದೃಷ್ಟಾಂತೇ ವಿಪ್ರತಿಪತ್ತಿಂ ಪ್ರತ್ಯಾಹ —
ನ ಹೀತಿ ।
ನಿರಾಕರ್ತವ್ಯತ್ವೇಽಪಿ ತೇಷಾಂ ಜ್ಞಾನಮಾತ್ರತ್ವಂ ಕಿಂ ನ ಸ್ಯಾದಿತ್ಯಾಶಂಕ್ಯಾಽಽತ್ಮೀಯಜ್ಞಾನತ್ವಮಾತ್ಮಜ್ಞಾನತ್ವಂ ವಾ ತೇಷಾಮಿತಿ ವಿಕಲ್ಪ್ಯ ಕ್ರಮೇಣ ದೂಷಯತಿ —
ನ ಹೀತ್ಯಾದಿನಾ ।
ಸ್ವಕೀಯನಿಷೇಧೇ ಸ್ವನಿಷೇಧೇ ಚಾನಿಷ್ಟಾಪತ್ತಿಮಾಚಷ್ಟೇ —
ತಥಾ ಚೇತಿ ।
ತದಂಗೀಕಾರಾಲೋಚನಾಯಾಮಪಿ ಪ್ರತಿವಾದ್ಯಾದೀನಾಂ ವಿಜ್ಞಾನಾತಿರೇಕಃ ಸೇತ್ಸ್ಯತೀತ್ಯಾಹ —
ನ ಚೇತಿ ।
ಅನ್ಯಥಾ ವಿವಾದಾಭಾವಾಪಾತಾದಿತಿ ಭಾವಃ ।
ಕಥಂ ತರ್ಹಿ ತೇಷಾಮಂಗೀಕಾರಸ್ತತ್ರಾಽಽಹ —
ವ್ಯತಿರಿಕ್ತೇತಿ ।
ಸಿದ್ಧೇ ದೃಷ್ಟಾಂತೇ ಫಲಿತಮನುಮಾನಂ ನಿಗಮಯತಿ —
ತಸ್ಮಾದಿತಿ ।
ಕಿಂಚ ಚೈತ್ರಸಂತಾನೇನ ಮೈತ್ರಸಂತಾನೋ ವ್ಯವಹಾರಾದನುಮೀಯತೇ ಸರ್ವಜ್ಞಾನೇನ ಚಾಸರ್ವಜ್ಞಜ್ಞಾನಾನಿ ಜ್ಞಾಯಂತೇ ತತ್ರ ಭೇದಸ್ಯ ತೇಽಪಿ ಸಿದ್ಧೇಸ್ತದ್ದೃಷ್ಟಾಂತಾನ್ನೀಲಾದೇಸ್ತದ್ಧಿಯಶ್ಚ ಭೇದಃ ಶಕ್ಯೋಽನುಮಾತುಮಿತ್ಯಾಹ —
ಸಂತತ್ಯಂತರವದಿತಿ ।
ಇತಿ ನ ಬಾಹ್ಯಾರ್ಥಾಪಲಾಪಸಿದ್ಧಿರಿತಿ ಶೇಷಃ ।
ತದಪಲಾಪಾಸಂಭವೇ ಫಲಿತಮಾಹ —
ತಸ್ಮಾದಿತಿ ।
ವಿಜ್ಞಾನಾದರ್ಥಭೇದೋಕ್ತ್ಯಾ ಪ್ರತ್ಯಗಾತ್ಮಾ ವಿಜ್ಞಾನಾತಿರಿಕ್ತ ಉಕ್ತಃ । ಸಂಪ್ರತಿ ವಿಮತಂ ನ ಜ್ಞಾನಭಿನ್ನಂ ಗ್ರಾಹ್ಯತ್ವಾತ್ಸ್ವಪ್ನಗ್ರಾಹ್ಯವದಿತ್ಯುಕ್ತಮನುವದತಿ —
ಸ್ವಪ್ನ ಇತಿ ।
ಅಯುಕ್ತಂ ವಿಜ್ಞಾನಾತಿರಿಕ್ತತ್ವಮರ್ಥಸ್ಯೇತಿ ಶೇಷಃ ।
ದೃಷ್ಟಾಂತಸ್ಯ ಸಾಧ್ಯವಿಕಲತಾಮಭಿಪ್ರೇತ್ಯ ಪರಿಹರತಿ —
ನಾಭಾವಾದಪೀತಿ ।
ಸಂಗ್ರಹವಾಕ್ಯಂ ವಿವೃಣೋತಿ —
ಭವತೈವೇತಿ ।
ಬಾಹ್ಯಾರ್ಥವಾದಿಭ್ಯೋ ವಿಶೇಷಮಾಹ —
ತದಭ್ಯುಪಗಮ್ಯೇತಿ ।
ತಥಾಽಪಿ ಕಥಂ ದೃಷ್ಟಾಂತಸ್ಯ ಸಾಧ್ಯವಿಕಲತೇತ್ಯಾಶಂಕ್ಯಾಽಽಹ —
ಸ ಇತಿ ।
ಘಟಾದಿವಿಜ್ಞಾನಸ್ಯ ಭಾವಭೂತಸ್ಯಾಭ್ಯುಪಗತಸ್ಯ ಘಟಾದೇರ್ಭಾವಾದಭಾವಾದ್ವಾ ವಿಷಯಾದರ್ಥಾಂತರತ್ವಾದ್ಯಸ್ಯ ಕಸ್ಯಚಿದ್ಬಾಹ್ಯಾರ್ಥಸ್ಯೋಪಗಮಾದ್ದೃಷ್ಟಾಂತಸ್ಯ ಸಾಧ್ಯವಿಕಲತಾ ಸುಪ್ರಸಿದ್ಧೇತ್ಯರ್ಥಃ ।
ಮಾಧ್ಯಮಿಕಮತಮತಿದೇಶೇನ ನಿರಾಕರೋತಿ —
ಏತೇನೇತಿ ।
ಜ್ಞಾನಜ್ಞೇಯಯೋರ್ನಿರಾಕರ್ತುಮಶಕ್ಯತ್ವವಚನೇನೇತಿ ಯಾವತ್ ।
ಆತ್ಮನೋ ಗ್ರಾಹ್ಯಸ್ಯಾಹಮಿತಿ ಪ್ರತ್ಯಗಾತ್ಮನೈವ ಗ್ರಾಹ್ಯತೇತಿ ಮೀಮಾಂಸಕಮತಮಪಿ ಪ್ರತ್ಯುಕ್ತಮೇಕಸ್ಯೈವ ಗ್ರಾಹ್ಯಗ್ರಾಹಕತಯಾ ನಿರಸ್ತತ್ವಾದಿತ್ಯಾಹ —
ಪ್ರತ್ಯಗಾತ್ಮೇತಿ ।