ನನು ಅತ್ರ ಕಥಂ ಪುರುಷಃ ಸ್ವಯಂ ಜ್ಯೋತಿಃ ? ಯೇನ ಜಾಗರಿತ ಇವ ಗ್ರಾಹ್ಯಗ್ರಾಹಕಾದಿಲಕ್ಷಣಃ ಸರ್ವೋ ವ್ಯವಹಾರೋ ದೃಶ್ಯತೇ, ಚಕ್ಷುರಾದ್ಯನುಗ್ರಾಹಕಾಶ್ಚ ಆದಿತ್ಯಾದ್ಯಾಲೋಕಾಃ ತಥೈವ ದೃಶ್ಯಂತೇ ಯಥಾ ಜಾಗರಿತೇ — ತತ್ರ ಕಥಂ ವಿಶೇಷಾವಧಾರಣಂ ಕ್ರಿಯತೇ — ಅತ್ರ ಅಯಂ ಪುರುಷಃ ಸ್ವಯಂ ಜ್ಯೋತಿರ್ಭವತೀತಿ । ಉಚ್ಯತೇ — ವೈಲಕ್ಷಣ್ಯಾತ್ ಸ್ವಪ್ನದರ್ಶನಸ್ಯ ; ಜಾಗರಿತೇ ಹಿ ಇಂದ್ರಿಯಬುದ್ಧಿಮನಆಲೋಕಾದಿವ್ಯಾಪಾರಸಂಕೀರ್ಣಮಾತ್ಮಜ್ಯೋತಿಃ ; ಇಹ ತು ಸ್ವಪ್ನೇ ಇಂದ್ರಿಯಾಭಾವಾತ್ ತದನುಗ್ರಾಹಕಾದಿತ್ಯಾದ್ಯಾಲೋಕಾಭಾವಾಚ್ಚ ವಿವಿಕ್ತಂ ಕೇವಲಂ ಭವತಿ ತಸ್ಮಾದ್ವಿಲಕ್ಷಣಮ್ । ನನು ತಥೈವ ವಿಷಯಾ ಉಪಲಭ್ಯಂತೇ ಸ್ವಪ್ನೇಽಪಿ, ಯಥಾ ಜಾಗರಿತೇ ; ತತ್ರ ಕಥಮ್ ಇಂದ್ರಿಯಾಭಾವಾತ್ ವೈಲಕ್ಷಣ್ಯಮುಚ್ಯತ ಇತಿ । ಶೃಣು —