నను అత్ర కథం పురుషః స్వయం జ్యోతిః ? యేన జాగరిత ఇవ గ్రాహ్యగ్రాహకాదిలక్షణః సర్వో వ్యవహారో దృశ్యతే, చక్షురాద్యనుగ్రాహకాశ్చ ఆదిత్యాద్యాలోకాః తథైవ దృశ్యన్తే యథా జాగరితే — తత్ర కథం విశేషావధారణం క్రియతే — అత్ర అయం పురుషః స్వయం జ్యోతిర్భవతీతి । ఉచ్యతే — వైలక్షణ్యాత్ స్వప్నదర్శనస్య ; జాగరితే హి ఇన్ద్రియబుద్ధిమనఆలోకాదివ్యాపారసఙ్కీర్ణమాత్మజ్యోతిః ; ఇహ తు స్వప్నే ఇన్ద్రియాభావాత్ తదనుగ్రాహకాదిత్యాద్యాలోకాభావాచ్చ వివిక్తం కేవలం భవతి తస్మాద్విలక్షణమ్ । నను తథైవ విషయా ఉపలభ్యన్తే స్వప్నేఽపి, యథా జాగరితే ; తత్ర కథమ్ ఇన్ద్రియాభావాత్ వైలక్షణ్యముచ్యత ఇతి । శృణు —