ತತ್ ತತ್ರ ಏತಸ್ಮಿನ್ , ಯಥಾ — ಪ್ರದರ್ಶಿತೇಽರ್ಥೇ ದೃಷ್ಟಾಂತೋಽಯಮುಪಾದೀಯತೇ — ಯಥಾ ಲೋಕೇ ಮಹಾಮತ್ಸ್ಯಃ, ಮಹಾಂಶ್ಚಾಸೌ ಮತ್ಸ್ಯಶ್ಚ, ನಾದೇಯೇನ ಸ್ರೋತಸಾ ಅಹಾರ್ಯ ಇತ್ಯರ್ಥಃ, ಸ್ರೋತಶ್ಚ ವಿಷ್ಟಂಭಯತಿ, ಸ್ವಚ್ಛಂದಚಾರೀ, ಉಭೇ ಕೂಲೇ ನದ್ಯಾಃ ಪೂರ್ವಂ ಚ ಅಪರಂ ಚ ಅನುಕ್ರಮೇಣ ಸಂಚರತಿ ; ಸಂಚರನ್ನಪಿ ಕೂಲದ್ವಯಂ ತನ್ಮಧ್ಯವರ್ತಿನಾ ಉದಕಸ್ರೋತೋವೇಗೇನ ನ ಪರವಶೀ ಕ್ರಿಯತೇ — ಏವಮೇವ ಅಯಂ ಪುರುಷಃ ಏತೌ ಉಭೌ ಅಂತೌ ಅನುಸಂಚರತಿ ; ಕೌ ತೌ ? ಸ್ವಪ್ನಾಂತಂ ಚ ಬುದ್ಧಾಂತಂ ಚ । ದೃಷ್ಟಾಂತಪ್ರದರ್ಶನಫಲಂ ತು — ಮೃತ್ಯುರೂಪಃ ಕಾರ್ಯಕರಣಸಂಘಾತಃ ಸಹ ತತ್ಪ್ರಯೋಜಕಾಭ್ಯಾಂ ಕಾಮಕರ್ಮಭ್ಯಾಮ್ ಅನಾತ್ಮಧರ್ಮಃ ; ಅಯಂ ಚ ಆತ್ಮಾ ಏತಸ್ಮಾದ್ವಿಲಕ್ಷಣಃ — ಇತಿ ವಿಸ್ತರತೋ ವ್ಯಾಖ್ಯಾತಮ್ ॥