ఎవమ్ అయం పురుష ఆత్మా స్వయం జ్యోతిః కార్యకరణవిలక్షణః తత్ప్రయోజకాభ్యాం కామకర్మభ్యాం విలక్షణః — యస్మాత్ అసఙ్గో హ్యయం పురుషః, అసఙ్గత్వాత్ — ఇత్యయమర్థః ‘స వా ఎష ఎతస్మిన్సమ్ప్రసాదే’ (బృ. ఉ. ౪ । ౩ । ౧౫) ఇత్యాద్యాభిస్తిసృభిః కణ్డికాభిః ప్రతిపాదితః ; తత్ర అసఙ్గతైవ ఆత్మనః కుతః — యస్మాత్ , జాగరితాత్ స్వప్నమ్ , స్వప్నాచ్చ సమ్ప్రసాదమ్ , సమ్ప్రసాదాచ్చ పునః స్వప్నమ్ , క్రమేణ బుద్ధాన్తం జాగరితమ్ , బుద్ధాన్తాచ్చ పునః స్వప్నాన్తమ్ — ఇత్యేవమ్ అనుక్రమసఞ్చారేణ స్థానత్రయస్య వ్యతిరేకః సాధితః । పూర్వమప్యుపన్యస్తోఽయమర్థః ‘స్వప్నో భూత్వేమం లోకమతిక్రామతి మృత్యో రూపాణి’ (బృ. ఉ. ౪ । ౩ । ౭) ఇతి — తం విస్తరేణ ప్రతిపాద్య, కేవలం దృష్టాన్తమాత్రమవశిష్టమ్ , తద్వక్ష్యామీత్యారభ్యతే —