ಯದ್ವೈ ತದಿತ್ಯಾದಿವಾಕ್ಯಂ ಚೋದಿತಾರ್ಥಾನುವಾದಸ್ತತ್ಪರಿಹಾರಸ್ತು ಪಶ್ಯನ್ನಿತ್ಯಾದಿವಾಕ್ಯಮಿತಿ ವಿಭಜತೇ —
ಯತ್ತತ್ರೇತಿ ।
ನ ಹೀತ್ಯಾದಿವಾಕ್ಯನಿರಸ್ಯಾಮಾಶಂಕಾಮಾಹ —
ನನ್ವಿತಿ ।
ಚಕ್ಷುರಾದಿವ್ಯಾಪಾರಾಭಾವೇಽಪಿ ಸುಷುಪ್ತೇ ದರ್ಶನಾದಿ ಕಿಂ ನ ಸ್ಯಾದಿತ್ಯಾಶಂಕ್ಯಾಽಽಹ —
ವ್ಯಾಪೃತೇಷ್ವಿತಿ ।
ಅಸ್ತು ತರ್ಹಿ ತತ್ರಾಪಿ ಕರಣವ್ಯಾಪಾರೋ ನೇತ್ಯಾಹ —
ನ ಚೇತಿ ।
ಅಯಮಿತಿ ಸುಷುಪ್ತಪುರುಷೋಕ್ತಿಃ ।
ನ ಪಶ್ಯತ್ಯೇವೇತಿ ನಿಯಮಂ ನಿಷೇಧತಿ —
ನ ಹೀತಿ ।
ತತ್ರ ಹೇತುಂ ವಕ್ತುಂ ಪ್ರಶ್ನಪೂರ್ವಕಂ ಪ್ರತಿಜ್ಞಾಂ ಪ್ರಸ್ತೌತಿ —
ಕಿಂ ತರ್ಹೀತಿ ।
ತತ್ರಾಽಽಕಾಂಕ್ಷಾಪೂರ್ವಕಂ ಹೇತುವಾಕ್ಯಮುತ್ಥಾಪ್ಯ ವ್ಯಾಚಷ್ಟೇ —
ಕಥಮಿತ್ಯಾದಿನಾ ।
ಅವಿನಾಶಿತ್ವಾದಿತ್ಯೇತದ್ವ್ಯಾಕುರ್ವಂದೃಷ್ಟೇರ್ವಿನಾಶಾಭಾವಂ ಸ್ಪಷ್ಟಯತಿ —
ಯಥೇತ್ಯಾದಿನಾ ।
ದ್ರಷ್ಟುರ್ದೃಷ್ಟಿರ್ನ ನಶ್ಯತೀತ್ಯತ್ರ ವಿರೋಧಂ ಚೋದಯತಿ —
ನನ್ವಿತಿ ।
ವಿಪ್ರತಿಷೇಧಮೇವ ಸಾಧಯತಿ —
ದೃಷ್ಟಿಶ್ಚೇತಿ ।
ಕಾರ್ಯಸ್ಯಾಪಿ ವಚನಾದವಿನಾಶಃ ಸ್ಯಾದಿತಿ ಶಂಕತೇ —
ನನ್ವಿತಿ ।
ತಸ್ಯಾಕಾರಕತ್ವಾನ್ನೈವಮಿತಿ ಪರಿಹರತಿ —
ನ ವಚನಸ್ಯೇತಿ ।
ತದೇವ ಸ್ಫುಟಯತಿ —
ನ ಹೀತಿ ।
ಯತ್ಕೃತಕಂ ತದನಿತ್ಯಮಿತಿ ವ್ಯಾಪ್ತ್ಯನುಗೃಹೀತಾನುಮಾನವಿರೋಧಾದ್ವಚೋ ನ ಕಾರ್ಯನಿತ್ಯತ್ವಬೋಧಕಮಿತ್ಯರ್ಥಃ ।
ಕೂಟಸ್ಥದೃಷ್ಟಿರೇವಾತ್ರ ದ್ರಷ್ಟೃಶಬ್ದಾರ್ಥೋ ನ ದೃಷ್ಟಿಕರ್ತಾ ತನ್ನ ವಿಪ್ರಷೇಧೋಽಸ್ತೀತಿ ಸಿದ್ಧಾಂತಯತಿ —
ನೈಷ ದೋಷ ಇತಿ ।
ಆದಿತ್ಯಾದಿಪ್ರಕಾಶಕತ್ವವದಿತ್ಯುಕ್ತಂ ದೃಷ್ಟಾಂತಂ ವ್ಯಾಚಷ್ಟೇ —
ಯಥೇತಿ ।
ದೃಷ್ಟಾಂತೇಽಪಿ ವಿಪ್ರತಿಪನ್ನಂ ಪ್ರತ್ಯಾಽಽಹ —
ನ ಹೀತಿ ।
ದರ್ಶನೋಪಪತ್ತೇರಿತ್ಯುಕ್ತಂ ದಾರ್ಷ್ಟಾಂತಿಕಂ ವಿಭಜತೇ —
ತಥೇತಿ ।
ಆತ್ಮನೋ ನಿತ್ಯದೃಷ್ಟಿತ್ವೇ ದೋಷಮಾಶಂಕತೇ —
ಗೌಣಮಿತಿ ।
ಗೌಣಸ್ಯ ಮುಖ್ಯಾಪೇಕ್ಷತ್ವಾನ್ಮುಖ್ಯಸ್ಯ ಚಾನ್ಯಸ್ಯ ದ್ರಷ್ಟೃತ್ವಸ್ಯಾಭಾವಾನ್ಮೈವಮಿತ್ಯುತ್ತರಮಾಹ —
ನೇತ್ಯಾದಿನಾ ।
ತಾಮೇವೋಪಪತ್ತಿಮುಪದರ್ಶಯತಿ —
ಯದಿ ಹೀತ್ಯಾದಿನಾ ।
ಅನ್ಯಥಾ ಕೂಟಸ್ಥದೃಷ್ಟಿತ್ವಮಂತರೇಣೇತಿ ಯಾವತ್ । ದರ್ಶನಪ್ರಕಾರಸ್ಯಾನ್ಯತ್ವಂ ಕ್ರಿಯಾತ್ಮತ್ವಮ್ । ತಸ್ಯ ನಿಷ್ಕ್ರಿಯತ್ವಶ್ರುತಿಸ್ಮೃತಿವಿರೋಧಾದಿತಿ ಶೇಷಃ ।
ದ್ರಷ್ಟೃತ್ವಾಂತರಾನುಪಪತ್ತೌ ಫಲಿತಮಾಹ —
ತದೇವಮೇವೇತಿ ।
ನಿತ್ಯದೃಷ್ಟಿತ್ವೇನೈವೇತ್ಯರ್ಥಃ ।
ಉಕ್ತೇಽರ್ಥೇ ದೃಷ್ಟಾಂತಮಾಹ —
ಯಥೇತ್ಯಾದಿನಾ ।
ತಥಾಽಽತ್ಮನೋಽಪಿ ದ್ರಷ್ಟೃತ್ವಂ ನಿತ್ಯೇನೈವ ಸ್ವಾಭಾವಿಕೇನ ಚೈತನ್ಯಜ್ಯೋತಿಷಾ ಸಿಧ್ಯತಿ ತದೇವ ಚ ದ್ರಷ್ಟೃತ್ವಂ ಮುಖ್ಯಂ ದ್ರಷ್ಟೃತ್ವಾಂತರಾನುಪಪತ್ತೇರಿತಿ ಶೇಷಃ ।
ಆತ್ಮನೋ ನಿತ್ಯದೃಷ್ಟಿಸ್ವಭಾವತ್ವೇ ಫಲಿತಮಾಹ —
ತಸ್ಮಾದಿತಿ ।
ತೃಜಂತಂ ದೃಷ್ಟೃಶಬ್ದಮಾಶ್ರಿತ್ಯ ಶಂಕತೇ —
ನನ್ವಿತಿ ।
ಅತ್ರಾಪ್ಯನಿತ್ಯಕ್ರಿಯಾಕರ್ತೃವಿಷಯಸ್ತೃಜಂತಶಬ್ದಪ್ರಯೋಗ ಇತಿ ಶೇಷಃ ।
ತೃಜಂತಶಬ್ದಪ್ರಯೋಗಸ್ಯಾನಿತ್ಯಕ್ರಿಯಾಕರ್ತೃವಿಷಯತ್ವಂ ವ್ಯಭಿಚರಯನ್ನುತ್ತರಮಾಹ —
ನೇತಿ ।
ವೈಷಮ್ಯಾಶಂಕತೇ —
ಭವತ್ವಿತಿ ।
ಆದಿತ್ಯಾದಿಷು ಸ್ವಾಭಾವಿಕಪ್ರಕಾಶೇನ ಪ್ರಕಾಶಯಿತೃತ್ವಮಸ್ತು ಕಾದಾಚಿತ್ಕಪ್ರಕಾಶೇನ ಪ್ರಕಾಶಯಿತೃತ್ವಸ್ಯ ತೇಷ್ವಸಂಭವಾನ್ನ ತ್ವಾತ್ಮನಿ ನಿತ್ಯಾ ದೃಷ್ಟಿರಸ್ತಿ ತನ್ಮಾನಾಭಾವಾತ್ । ತಥಾ ಚ ಕಾದಾಚಿತ್ಕದೃಷ್ಟ್ಯೈವ ತಸ್ಯ ದ್ರಷ್ಟೃತೇತ್ಯರ್ಥಃ ।
ಪ್ರತೀಚಶ್ಚಿದ್ರೂಪತ್ವಸ್ಯ ಶ್ರೌತತ್ವಾತ್ಕರ್ತೃತ್ವಂ ವಿನಾ ಪ್ರಕಾಶಯಿತೃತ್ವಮವಿಶಿಷ್ಟಮಿತ್ಯುತ್ತರಮಾಹ —
ನ ದೃಷ್ಟೀತಿ ।
ಕೂಟಸ್ಥದೃಷ್ಟಿರಾತ್ಮೇತ್ಯುಕ್ತೇ ಪ್ರತ್ಯಕ್ಷವಿರೋಧಂ ಶಂಕತೇ —
ಪಶ್ಯಾಮೀತಿ ।
ದ್ವಿವಿಧೋಽನುಭವಸ್ತಸ್ಯ ಕೂಟಸ್ಥದೃಷ್ಟಿತ್ವಮನುಗೃಹ್ಣಾತಿ ಚಕ್ಷುರಾದಿವ್ಯಾಪಾರಭಾವಾಪೇಕ್ಷಯಾ ಪಶ್ಯಾಮಿ ನ ಪಶ್ಯಾಮೀತಿ ಧಿಯೋರಾತ್ಮಸಾಕ್ಷಿಕತ್ವಾದಿತ್ಯುತ್ತರಮಾಹ —
ನ ಕರಣೇತಿ ।
ಆತ್ಮದೃಷ್ಟೇರ್ನಿತ್ಯತ್ವೇ ಹೇತ್ವಂತರಮಾಹ —
ಉದ್ಧೃತೇತಿ ।
ಆತ್ಮದೃಷ್ಟೇರ್ನಿತ್ಯತ್ವಮುಪಸಂಹರತಿ —
ತಸ್ಮಾದಿತಿ ।
ತನ್ನಿತ್ಯತ್ವೋಕ್ತಿಫಲಮಾಹ —
ಅತ ಇತಿ ।